FAMILIE BEDIENING

Idees en hulpbronne vir Familiebediening

Berei jou kind voor vir die toekoms

Toegerus vir die Toekoms

“Daar is nie net een toekoms nie… wat ons vandag kies, doen en oor praat, het ‘n invloed op die wêreld en ons toekoms.” Doris Viljoen

Wat weet ons van die toekoms:

  • Die ontluikende markte is besig om te groei.
  • Natuurlike hulpbronne raak skaarser.
  • Daar is verandering in die natuur patrone, wat die ekonomie beïnvloed.
  • Beroepe wat ons kinders gaan beoefen, bestaan nog nie. Ons berei hulle voor vir ‘n wêreld wat ons self nog nie ken nie.
  • Vryskutwerk en wêreldwye netwerke gaan die norm word.
  • Lewenslange leer raak noodsaaklik, omdat die wêreld so vinnig verander.

Wat moet ons ons kinders mee toerus?

(more…)

Die binnewêreld van ‘n kind

Toegerus vir die Toekoms

Kinders as leë houers of klei?

Kinders is nie leë houers waarin ons soveel as moontlik moet gooi nie. Ons kan nie bloot kennis aflaai op kinders en hulle “vul” nie. Hulle is eerder klei wat oor tyd gevorm word. Ons moet eerder daarop fokus om tyd saam met hulle te spandeer en hulle te begelei deur hulle ervarings. Die belangrikste is dat ons verstaan dat hulle van die begin af volledig mens is met volle menswaardigheid. Hulle is nie met ‘n junior weergawe van die Heilige Gees gebore nie. Ons kan dus baie by hulle leer of saam met hulle leer, en nie net vir hulle leer nie.

(more…)

Hoe maak ons ‘n verskil in skole?

Toegerus vir die Toekoms

Inleidend:

Kinders wat blootstelling aan die evangelie kry in die skool konteks het ‘n

  • 39% laer kans vir risiko gedrag
  • 59% hoër waarskynlikheid om om te gee vir ander
  • 59% positiewer verhoudings met ander

Daar is ongeveer 56 000 kerke end 26 000 skole in die land. Dit is dus heel haalbaar moontlik dat kerke ‘n impak kan maak op jongmense se vorming in die skool konteks. Daarom moet ons aanhou planne maak hoe ons as gelowige ouers en gemeente betrokke kan wees by skole. (more…)

Wat is die impak van Tegnologie op Kinders?

Toegerus vir die Toekoms

Tegnologie kan positief wees om verskeie redes, onder andere:

  • Kinders en jongmense het a.g.v. tegnologie toegang tot soveel meer informasie en is daarom ook beter ingelig en meer kreatief.
  • Tegnologie kan verhoudings versterk en konneksie verhoog.
  • Dit kan ‘n hulpmiddel wees, byvoorbeeld vir kinders met spesiale behoeftes.

(more…)

Idees vir Ouers & Kinders om Geestelik te Connect

  1. Eet saam met dieper kommunikasie: Gesinne kan byvoorbeeld aangemoedig word om tuis saam te eet en ‘n gespreksvraag wat by die erediens gegee is te bespreek. ‘n Gemeente-ete kan ook gereël word waar dit gebeur by die kerk met baie gesinne saam.
  2. Huisgelooftyd – spandeer tyd saam om ‘n teks: Gesinne kan byvoorbeeld aangemoedig word om ‘n huisgeloofboekie te gebruik of die kategese geselsblad (wat aanhaak by die week se les) word uitgegee of ‘n familie huisgeloofpakket kan tydens feestye soos Paasfees/Lydenstyd/Advent/Kersfees uitgedeel word.
  3. Mylpaalviering – Vier verjaarsdae, gebeure en herdenkings saam en herinner mekaar aan God se betrokkenheid by jul lewens en bid saam: Ouers kan byvoorbeeld met die doop van hulle kind toegerus word om die doop jaarliks te vier saam met hulle. Spesiale dienste help oor gesinne om ook tuis mylpale te vier, bv. ‘n matriekdiens aan die begin van die matriekjaar/-eksamen of ‘n Graad 1 Ouer en Kind Oggend.
  4. Daaglikse Gewoontes – Geestelike gewoontes wat gereeld of daagliks deel is van jul gesin se roetine: Ouers kan byvoorbeeld met ouertoerusting idees gegee word vir daaglikse gewoontes soos hoe om saam te bid voor ete, mekaar te groet op ‘n spesiale manier, te bid voor reis, ens.
  5. Familietyd – Ouers word aangemoedig of toegerus om ‘n weeklikse tyd saam as gesin te hê om mekaar beter te leer ken en verhoudings te bou: Voorbeelde hiervan is om gesinne aan te moedig om een aand per week die televisie af te skakel en daardie aand saam kos te maak, te eet en saam ‘n speletjie te speel. Hierdie speletjie kan iets wees wat uitgedeel word by die erediens en aanhaak by die gemeente se huidige preek-tema.
  6. Events: Die gemeente kan geleenthede reël waar verhoudings in families versterk kan word, byvoorbeeld ‘n familiepiekniek, ‘n familiedans, ‘n familiekamp of ‘n familie-nagmaal.

Hoekom is die HELE Bybel nodig?

‘n Jongmens vra “hoekom moet ons die hele Bybel lees en nie net die Nuwe Testament nie?”

Die Bybel is oos ‘n fliek

‘n Maklike manier om dit vir ‘n tiener te verduidelik is om die Bybel te vergelyk met ‘n fliek. Om die laaste (en belangrike deel) van die fliek te verstaan, help dit as jy die eerste deel van die storie gekyk het. As jy die fliek in die middel begin kyk, dan verstaan ‘n mens nie al die gebeure of karakters nie. Die impak van die fliek is dan minder. Dieselfde geld met die Bybel. Dit is ‘n versameling stories wat vertel van God se reis met die mens oor ‘n baie lang tyd. Jesus se koms het ‘n nuwe tydperk ingelei en daarom volg ons nie meer die wette of offerdiens of praktyke van die `Ou Testament nie. Maar deur die Ou Testament te lees verstaan ons die grootheid van Jesus se koms en die gawe van Sy genade soveel beter.

Die jongmens vra verder “maar hoekom is sekere dele so vreemd”?

Die Bybel is soos Netflix

Die Bybel is ‘n versameling stories soos Netflix ‘n biblioteek van flieks en programme is. As jy die dag ‘n fliek wil kies om te kyk, dan moet jy eers besluit watter kategorie of genre fliek jy wil kyk… Aksie? Drama? Comedy? Series? Science-fiction? Jy gaan met ‘n verskillende ingesteldheid na elkeen kyk. Sommige flieks gaan jou laat lag, ander gaan jou iets leer? Soms gaan ‘n fliek jou laat ontspan, ander kere gaan dit jou uitdaag.  Dieselfde geld met die verskillende Bybel-boeke. Genesis en Psalms is verskillende tipe boeke en klink verskillend. ‘n Mens kan nie Jesaja en Johannes op dieselfde manier lees nie. Filippense en Openbaring is nie met dieselfde doel geskryf nie.

Wenke wanneer jy Bybel lees

  • Ken die groot gebeure (storielyn) van die Bybel.
  • As jy ‘n boek lees, vra jouself af waar in die storielyn dit inpas.
  • Kyk of die tema van die teksgedeelte iets is wat deurlopend in die Bybel belangrik is, of net in daardie tydperk van die storie (bv. offers, slawerny, oorlog, kerk, genade, die Gees).
  • Probeer om ‘n hele boek (bv. Lukas) deur te lees oor tyd (en nie net los tekste nie.
  • Vind meer uit oor die agtergrond en karakters in die verhaal.
  • Laat die Gees jou lei om die waarheid in die verhaal te ontdek sodat die verhaal jou raak en vorm.

Huis geloof speletjies

Tydens die SAAM! gesprek oor intergenerasie bediening het ons ‘n speletjie gespeel wat ouers saam met kinders kan gebruik vir huisgeloof of wat jeugwerkers/predikante kan gebruik vir kategese.

Laai die bordspel, dobbelsteun en instruksies hier af:

Hoekom doop ons?

‘n Gesprek met ‘n tiener deur Gielie Loubser

Waar begin God se pad met die mens:

Adam – die terme van die eerste verbond – jy moet dit en dat doen Ek sal dan dit en dat doen

Gevolg :Sondeval en sondvloed

Noag die enigste regverdige  Die verbond se terme staan steeds ( ook hy val en sondig en alles verval tot chaos)

Gevolg: Toring van Babel – ’n tweede einde

’n Derde en laaste begin – met Abraham ( word daarom ook die vader van die gelowiges genoem)

Lees Gen. 15:1-18

Die Here sluit ’n nuwe verbond met Abraham, wat nuwe terme en kondisies het. Die eerste verbond met Adam en Noag het misluk omdat die Here verwag het dat die mens sy kant van die verbond moet nakom dan eers sal God Sy kant nakom.

Die nuwe verbond se terme is dat God twee keer tussen die stukke vleis deurloop ( vers 17) en daarom beide kante van die ooreenkoms se verantwoordelikheid dra.

Dit gebeur dan dat die volk nie hulle ooreenkoms hou nie, en nou moet die oordeel van die verbond voltrek word ( soos die stukke vleis in twee geskeur word) maar God staan ook daarvoor in en stuur Sy enigste seun om aan die kruis in twee geskeur te word.

Voor Jesus gebore is word egter Johannes die doper gebore. Sy opdrag is om die pad vir die Here gelyk te maak. Hy is die eerste mens op aarde wat met die gebruik van die doop te begin, hy doop mense in die Jordaan. Hy bedien ’n egter bekeringsdoop, die Johannes-doop: Bekeer julle van julle slegte wee en maak die pad vir die Messias gelyk. Hy self sê hy doop net met water maar Jesus wat an hom kom, sal met die Gees en vuur doop. (Matt3:11)

Jesus word egter ook deur Johannes gedoop maar dis nie omdat Jesus dit nodig het nie, Hy is tog nie sondig nie en dis daarom nie nodig dat Hy Hom moet nie bekeer nie. Dis egter net die identifisering met die mens en juis die sondigheid van die mens sodat Hy ons sonde op Hom kan neem met die kruisiging.

Ons hoef ons nie ook te laat doop met ’n Johannes-doop of bekerings-doop nie. Dit was net ’n voorbereidingstyd vir Jesus se koms. Selfs Paulus sê later dat die Johannes-doop gekom en gegaan het. (Hand 19:3-5) Die Christelike doop wat ons ontvang het, is in die naam van die Vader Seun en Gees.

Met die groot opdrag in Matt. 28:19 staan daar: “maak die mense my dissipels en doop hulle in die naam van die Vader Seun en Gees.  Die volgorde van eers dissipels word en dan doop dui vir sommige mense daarop dat jy nie kinders moet doop nie, maar net gelowiges wat hulle eers bekeer het.

Dis egter belangrik om te verstaan dat dit die groot sending opdrag is. Gaan na alle nasies toe. Dis omdat dit in ’n sending konteks of tyd geskryf. Ook die boek Handelinge wat die meeste skryf oor die doop praktyke is in ’n sending konteks geskryf want die boek se naam is die Handelinge van die Apostels. Ons kan ook sê die sendingwerk van die Apostels. Dis daarom logies dat die volgorde in die sendingveld of konteks eers bekering dan doop sal wees. Jy kan tog nie na ’n persoon toe gaan en sê ek wil vir jou van Jesus vertel maar ek gaan jou eers net doop nie, jy sal later alles verstaan nie. Geen mens sal dit toelaat nie. Nee in ’n sending konteks maak jy eers dissipels en doop dan.

Maar is daar wel tekste wat vertel van kinders wat gedoop word? Daar is baie tekste wat vertel van grootmense wat gedoop word. LW Weereens is dit die feit dat Handelinge van eerste geslag gelowiges praat , ‘n sending konteks. Daar is egter ’n paar verhale wat vertel van die hele huisgesin wat gedoop is Hand 16:15 vertel van Lidia en haar hele huis wat gedoop is – op grond van Lidia se geloof en so ook Hand 16:33 wat vertel van die tronkbewaarder. Al kan ons nie bewys dat daar babatjies in die huis was nie ( en dis heel moontlik want families het as clans saam in huise gebly) kan ons seker weet daar was kinders en sien ons dat op grond van die volwassenes se geloof die huisgesin gedoop is. ( LW daar is baie gelowiges wat dink jy moet ook na jou bekering ook nog met die Heilige Gees gedoop word en dat dit alleen sal gebeur met ‘n handoplegging tydens n aparte ritueel wat hulle noem, die doop met die Heilige Gees. Daar is egter geen formule in die Bybel oor hoe jy die Gees ontvang het nie. Hand 10:44 vertel dat sommige sommer onder ’n preek die Gees ontvang het. Dit was weereens in ’n sending konteks waar die Gees nog nie orals op aarde uitgestort was nie. Ons word in die naam van die Gees gedoop en ontvang die Gees met ons doop)

Die belangrikste egter is om weer terug te gaan na die verbond wat steeds geldend is, God noem dit ’n blywende verbond met Abraham ons Vader. Hoe werk die terme en kondisies van hierdie blywende verbond! As ons eers ons moet bekeer voor ons gedoop kan word, is ons eintlik by die terme van die eerste verbond.

Die doop is iets wat God aan ons doen voordat ons kon kies kon vra!  Die doop is ’n aksie van God aan ons. In die doop is ons passiewe ontvangers van die bevestiging van God se liefde. Net soos Abraham geslaap het! Daarom die doop aan kinders te bedien wat nie weet of kan onthou nie, verander niks aan die waarde of geldigheid of betekenis van die doop nie. Dis juis die mooi daarvan dat God Homself aan ons verbind deur die doop en ons van die begin af insluit in hierdie genade verbond ( net soos met die besnydenis van 8 dae oue babatjies)

Die doop is een van 2 sakramente en en sakramente is heilige goed wat God vir en aan ons doen om ons geloof te verstrek. Sakramente is nie iets wat ons doen om ons geloof te bely of ons liefde aan God te wys nie. Nee dis iets wat ons net ontvang om ons geloof mee te verstrek. Dis soos ’n anker vir ons pad.

Die een sakrament is eenmalig en dis die doop. Die ander een is herhalend en dis die nagmaal. As ons die eenmalige sakrament wil herhaal deur ons te laat weer doop of herdoop is ons besig om vir God te sê dat ons Hom nie op Sy woord kan neem nie. Ons kan Hom eintlik nie glo nie en daarom moet Hy dit weer doen.  Mens kan seker sê ja maar ek onthou niks daarvan nie, maar dis waarom die ouers vir die kind van sy/haar doop moet vertel en dit herdenk. Daarom word net die kinders van gelowige ouers gedoop en moet die ouers met die doop weer hulle geloof bely!

Die tweede probleem met herdoop is dat jy jou anker verloor. As jy met die doop vir God en ander iets wil sê is dit so goed soos dat jy die anker vat en op jou eie dek van jou boot gooi. Dan bied dit vir jou geen vastigheid nie. Ankers moet buite ons wees. Buite ons ervaringsveld of gemoedstoestande of ons ervaring van ons vlakke van heiligheid of geloof. Die doop is die moeder van alle” bottomlines” in jou lewe. Jy hoef nooit aan jou doop te twyfel nie, want dis iets wat God aan jou gedoen het!

Net so is ook die nagmaal daar om ons te help glo! Moenie ’n sakrament gebruik om iets te doen nie. Dis nie jou aksie nie, nee sakramente is iets wat God aan jou doen. As jy jou geloof wil bely met die doop is dit so goed soos jy vat ’n skroewedraaier om ’n brief te skryf. Jy het verkeerde instrument beet!

Die doop is egter nie ’n “magic” aksie wat jou red nie. Nee dis net ’n bevestiging van God se onvoorwaardelike en onfeilbare liefde. Dis so goed soos jou geboortesertifikaat wat bewys dat jy wel deel is van die familie. Maar dit beteken nie jy wil deel van die gesin wees nie. As jy nooit huis toe kom nie as jy nooit jou identiteit opneem nie behoort jy ook nie aan die gesin nie. Maar die doop troos jou as jy wel dink jy is nie goed genoeg vir die huisgesin van God nie, dit versterk jou geloof en is daarom ’n teken en seël van God se liefde vir jou.

Leef daarom uit jou doop. Leef uit die wete dat God jou gekies het. Dis al geloofsekerheid wat daar bestaan. Ons sekerheid lê nie in onsself of in hoe goed ons is op probeer wees nie. Ons sekerheid lê in die karakter van God. Ons sekerheid lê in die liefde en genade van God. Of ek altyd glo weet ek nie, maar ek weet in WIE ek glo.

Ek glo in die een wat weet dat Hy twee keer deur die stukke vleis moes gaan om met ons ’n blywende verhouding te kon hê. Wat ook ons skuld moes dra. Daarvan is die doop ’n teken en seël. Leef uit jou identiteit as geliefde van die Here. Aanvaar die identiteit as geliefde van God, deel van die huisgesin van God. Bekering daarom is net die aanvaarding van ons dieper identiteit. Bekering is die ophou stry teen ons diepste aard, dis die terugkom na God, die gaan rus in Sy arms wat red en vertroos. Daaraan herinner die doop ons. Of jy dit nou wil weet of nie. Maar die wat dit weet kan rus vind kom, kom terug huis toe en word ’n kind van God genoem.

“Alike” – pixar videogreep oor kreatiwiteit

“Alike” – pixar videogreep oor kreatiwiteit

Die pixar kortfilm “Alike” handel oor die samelewing wat kreatiwiteit, spontaniteit en die kunste onderdruk. Baie toepaslik om vir ‘n oueraand te gebruik om te gesels oor die uniekheid van kinders en die belang van spel en verbeelding. Die videogreep kan egter ook gebruik word om oor ander temas te gesels soos byvoorbeeld hoe ons mense se “godbelewenisse” in boksies plaas of hoe om God se stem opnuut te hoor. Of om te gesels oor wat ons eenders maak as gelowiges en wat ons anders maak. Of om oor diversiteit te gesels.

Huisgeloof – ‘n gesprek oor die Heilige Gees

WIND

Staan in die wind of voor ‘n waaier. haal ook diep asem terwyl jou hand ‘n entjie voor jou (oop) mond hou. gesels oor hoe ‘n mens nie die Heilige Gees kan sien nie en nie altyd bewus is van die Gees nie. tog is Hy soos die wind of suurstof altyd om ons en in ons aan die werk. soms kan jy hom voel of sy werk sien.

STERRE

Staan buite in die nag en kyk na sterre. Gesels oor die sterre oor hoe wonderlik hulle is. Praat dan oor hoe helder elkeen brand en lig maak. gesels oor hoe die Heilige Gees ons help om lig te maak en te skyn deur hoe ons getuienis.

KERSE

Skakel al die ligte af en steek ‘n kers aan en kyk na hoe dit brand. gesels oor hoe die Heilige Gees ons troos en lei in moeilike (donker) tye.

SPIEEL

Staan voor ‘n spieel. hoe help die Heilige Gees ons om meer soos Jesus te lyk en op te tree? Hoe help hy ons om goeie besluite te neem.

KLEI

Speel met die klei. jul kan iets van jouself uitbeeld. gesels oor hoe die Heilige Gees ons vorm deur ons aan Jesus (en sy woorde) te herinner. Hoe verander / vorm die Gees ‘n mens?

TUIN

Plant saam saadjies of werk in die tuin / groentetuin. gesels oor hoe die Heilige Gees ons help om te groei. hoe is ons soos saad? Hoe gee Hy vir ons kos en water? Hoe snoei hy ons? Watter vrugte dra ons as die Gees deur ons werk?

ALARM

Stel almal ‘n wekker of horlosie of selfoon vir die tyd wanneer julle wil gesels. wanneer die alarms / wekkers afgaan gesels oor hoe die Heilige Gees ons herinner. Hy help ons onthou. Hy herinner ons aan Jesus se beloftes.

WATER

gaan stap langs water (‘n dam, swembad of waterpoel). gesels oor hoe belangrik water is vir die mens. wat beteken dit dat die Heilige Gees soos ‘n fontein in ons binneste is? wat beteken dit dat die Heilige Gees ons dors wil les en ons wil vul met lewende water?

Vir meer inligting, Bybelstudies of idees oor die Heilige Gees, besoek www.onsglo.co.za of laai die onsglo app af in die google playstore of in die appstore.

 

Huisgeloof doopviering

Huisgeloof – idees om die doop te vier in gesinne

  • Vind uit wanneer elkeen in die gesin se doopdatum is. Stoor dit op julle fone se kalenders en vier elke jaar op daardie dae ‘n “doop-verjaarsdag” saam met daardie gesinslid om hulle te herinner dat hulle God se kind is.
  • Vertel vir jou kinders van hul doopdag – kyk na fotos, vertel stories, lees weer saam die teksgedeelte. Vertel wat dit vir jou beteken het as ouer om jou kind te laat doop.
  • Vul ‘n bakkie met water en sit dit op julle etenstafel. Voor julle saam eet, gebruik ‘n oomblik om jul doop te vier. Julle kan byvoorbeeld elkeen ‘n vinger in die water doop en dan hardop bid: “Dankie Jesus dat ek gedoop is. Dankie dat U vir my lief is en altyd by my is.”

Vir ‘n Bybelstudie oor die tema “doop” besoek http://www.onsglo.co.za/2017/02/06/doop/

Die “onsglo” toep is ook gratis beskikbaar om af te laai vanaf die google playstore en die appstore.

Huisgeloof nagmaal gesprek

Idees om oor nagmaal saam te gesels in gesinne

  • Lees en bespreek die verhaal van die eerste nagmaal in Matteus 26: 26-30
  • Hoe sal jy die Nagmaal verduidelik aan iemand wat dit vir die eerste keer gaan gebruik?
  • Maak ‘n plakkaat met ten minste 5 verskillende woorde wat Nagmaal beskryf.
  • Vind uit wanneer julle volgende Nagmaal-Sondag by die gemeente is. Hoe kan jul as gesin daar dien? Bv. help met die brood sny, die tekens uitdeel, opwas na die tyd ens.
  • Bak brood saam as familie. Terwyl julle die brood bak gesels oor julle eerste Nagmaal ervaring of wat die Nagmaal beteken.

Om meer te lees oor nagmaal of ‘n Bybelstudie oor die tema saam te doen, besoek: http://www.onsglo.co.za/2017/02/06/nagmaal/

Die “onsglo” toep is ook gratis beskikbaar om af te laai vanaf die google playstore en die appstore.

Huisgeloof gesprek oor belydenis van geloof

Gesels as gesin oor Belydenis van Geloof

  • Teken ‘n tydlyn van die hoofstukke van jou lewe. Vul die hoogtepunte en laagtepunte in. Watter spesiale oomblikke wat jy wil onthou en vier? Hoekom was hierdie oomblikke spesiaal in jou lewe? Hoe was God teenwoordig in al die verskillende hoofstukke?
  • Maak ‘n lys van ‘n paar oomblikke in jul as gesin (of elkeen apart) se lewe waar jy ‘n spesiale ervaring van God gehad het.
  • Ouers kan deel wat dit vir hulle beteken dat hulle belydenis van geloof afgelê het. Watter betekenis hou dit vir hulle vandag in?
  • Vra iemand in jou familie of iemand wat jul ken wat reeds belydenis van geloof afgelê het, om te vertel van hul ervaring en wat dit vir hulle beteken het. 
  • Gesels oor hoe Belydenisaflegging ‘n “antwoord op jou doop” is.

 

Vir ‘n Bybelstudie oor die tema “belydenis van geloof” besoek www.onsglo.co.za/2017/02/06/belydenis-van-geloof/

Die “onsglo” toep is ook gratis beskikbaar om af te laai vanaf die google playstore en die appstore.

 

Kinders en die internet

10 wenke om hul veilig te hou!

deur Anriëtte de Ridder

  1. Lees meer oor internet veiligheid en die invloed van skermtyd sodat jy ‘n ingeligte ouer kan wees wat verantwoordelike besluite neem. www.commonsensemedia.org/cell-phone-parenting antwoord ‘n hele paar vrae hieroor en gee praktiese wenke.
  2. Stel ‘n wagwoord op jou rekenaar, foon en tablet sodat jy weet wanneer jou kind dit wil gebruik. Moenie dat jou kinders na willekeur op die internet kan gaan of videos kan kyk of toeps kan aflaai nie. Stel jou “parenting controls” op al die verskillende toestelle in die huis (rekenaars, tv, selfone ens). https://www.internetmatters.org/parental-controls/
  3. Wees altyd by as jou kind die internet gebruik. Gebruik ook ‘n veiliger soekenjin wat vir kinders ontwerp is soos byvoorbeeld Kiddle http://www.kiddle.co/ of Kids search http://www.kids-search.com/ of http://www.swiggle.org.uk/. Google het ook ‘n “safe search” funksie wat aangeskakel kan word en eksplisiete resultate uithou. So ook youtube  – lees meer daaroor hierhttp://parentalcontrols-on.org/YouTube. Daar is ook spesifieke apps wat help met navorsing vir take. Tieners moet verkieslik in oop, gemeenskaplike areas in die huis die internet gebruik.
  4. Sit jou foon of tablet op “flight mode” wanneer hul fotos wil kyk of speletjies wil speel sodat hulle nie per ongeluk internet toegang verkry nie.
  5. Stel “location settings” af. Stel jou “privacy settings” hoog by al jou sosiale media profiele.
  6. Maak seker jou foon  / tablet het ouderdomsbeperkinge en kontroles op! Dit verhoed sekere webtuistes om oop te maak sonder ‘n wagwoord of jou kind om nuwe apps af te laai, ens. Maak seker jy ken al die veiligheidstellings.  Lees meer hieroorhttps://www.commonsensemedia.org/cell-phone-parenting/how-do-i-set-parental-controls-on-the-iphone
  7. Gaan uit en sit af – Maak jou foon se apps toe wanneer jy dit nie gebruik nie. Gaan uit die internet wanneer jy nie jou rekenaar gebruik nie. Sit jou rekenaar/ foon af as jy dit nie gebruik nie.
  8. Wees self ‘n voorbeeld! Jou kind of tiener sal gou agterkom waarvoor jy die internet gebruik. Asook of jy afhanklik is van skermtyd.
  9. Gesels met jou kind oor die waarde asook die gevare van die internet, sodat hy/sy ook verantwoordelikheid kan neem by maats se huise.
  10. Stel saam as gesin reëls op oor internet gebruik (waarvoor, hoe, wanneer), skermtyd (wat, hoe lank), en sosiale media (hoe, wat, wanneer, met wie). Maak saam ‘n plakkaat en plak dit op waar almal dit kan sien.

Nog nuttige skakels:

https://www.internetmatters.org/advice/6-10/

https://www.commonsensemedia.org/cell-phone-parenting

https://www.commonsensemedia.org/videos/5-internet-safety-tips-for-kids