idees

10 idees om gesinne saam te bedien

  1. Familiekamp

Dit is ‘n wonderlike manier om genoeg tyd te kry met gesinne om hulle bekend te stel aan geloofsgewoontes. Hierdie kamp is nie net ‘n saamkuier kamp met ‘n Sondag “erediens” nie, maar ‘n kamp met ‘n paar kort sessies waar geloofsgewoontes prakties ingeoefen word.

Wat doen ‘n mens egter op ‘n kamp met gesinne wat hoërskool kinders ook het? Kan ‘n mens een kamp vir alle gesinne doen? Een moontlikheid is dat ‘n mens hier en daar dan iets “ouer” uitwerk vir die gesinne wat tieners het. Of dalk eerder ‘n kamp hou een jaar met gesinne met (oorwegend) voorskool en laerskool kinders en die daaropvolgende jaar ‘n kamp met gesinne met (oorwegend) hoërskoolkinders. Dit is egter belangrik dat die hele gesin, ongeag die gesinsamestelling, welkom moet voel.

  1. Tent oorslaap aand

Dit kan by die kerk gebeur, in die kerksaal of in die tuin van die kerk of dit kan op ‘n sportveld of ander plek gebeur. Die hele gesin kom kamp, indien moontlik, en daar is ‘n kort program wat gesinne iets leer oor huisgewoontes.

  1. Tiener uitreik

Baie gemeentes hou in die Julie vakansie ‘n uitreik vir tieners na ‘n ver plek. Hiervoor is daar gewoonlik sessies vooraf om die tieners voor te berei. Een idee is dat ouers (en ander gesinslede) ook vooraf na een van die sessies genooi word om meer te hoor van waaroor die uitreik gaan. Hulle moet dan tydens hierdie sessie ook in gesinsverband praat oor die tieners se verwagtings, ens. Hierdie geselstyd word gefasiliteer.  Só leer gesinne om op ‘n dieper vlak met mekaar te gesels. Na die uitreik plaasgevind het, kan daar ‘n braai gehou word waar ouers (gesinne) ook genooi word om terugvoer stories van die uitreik te hoor.

  1. Tiener kamp

Ouers moet tieners op Sondagoggend kom haal by die kamp en die laaste “sessie” bywoon van die kamp. Dit kan die vorm aanneem van ‘n piekniek, waar tieners die geliefkoosde kampliedjie vir hulle ouers sing, en waar daar ook vertel word wat die tema van die kamp was. Daar kan geleentheid wees vir een of twee getuienisse (vooraf gereël met die betrokke tieners). Daarna kan ‘n fasiliteerder die tieners begelei om aan hulle ouers (in gesinsverband) te vertel:

  • waar hulle die Here ontmoet het op die kamp
  • wat het hulle geleer oor God / geloof
  • wat het hulle ervaar
  • watter aanbiddingslied tot hulle gespreek het
  • watter teks die meeste tot hulle gespreek het

Dit is belangrik egter dat tieners voorberei word hiervoor, aangesien almal nie noodwendig vrymoedigheid het om spontaan hieroor te gesels nie. Tieners wie se ouers nie kan kom nie, moet ook verwelkom word in ander gesinne sodat hulle deel kan wees.

  1. “Familiekamp” waar gesinne tuis slaap

‘n “Kamp” word gehou by die kerk, maar gesinne slaap saans tuis. Dit bespaar kostes en maak dit vir almal moontlik om te kom. Ook diegene met besige programme kan byvoorbeeld vir die Saterdagaand aansluit.

  1. Ouertoerusting

‘n Ouerskap kursus of geleentheid word gereël waar ouers toegerus word. Tydens sekere van die sessies of op ‘n sekere tyd, word die kinders / tieners genooi om by te kom sodat daar saamgesels kan word of een van die aktiwiteite geoefen kan word.

  1. Erediens om tafels

‘n Alternatiewe diens word gehou waar ouers en kinders / tieners om tafels sit sodat die erediens interaktief kan plaasvind. In die meeste gesinne vind geloofsgesprekke nie gereeld plaas nie. Hierdie is ‘n ideale geleentheid om te oefen om saam die teks te lees en die vrae te bespreek.  Almal moet deelneem en moet geleentheid kry om te gesels. Dit werk ook goed om ‘n aktiwiteit na aanleiding van die tema te doen in gesinsverband, byvoorbeeld familie waardes te teken, of ‘n kruis te versier vir Lydenstyd.  Die kinders / tieners wie se ouers nie opdaag nie, word ingedeel by hulle maats se gesinne en welkom laat voel. Dit is ook moontlik om dit met die hele gemeente te doen.

  1. Kategese met ouers

Ouers kan genooi word om gereeld (elke kwartaal) of tydens spesiale geleenthede saam kategese by te woon. Dit help ouers om saam die “les” te ervaar, die kategeet te ontmoet en ‘n ondersteuningstelsel vir die kategeet te vorm. Dit is ook ‘n goeie geleentheid om as gesinne saam te gesels oor ‘n tema. Die tema van die byeenkoms kan die Kerkjaar wees, ‘n familie of geloofsgewoonte bespreek en in-oefen of selfs die lewensfase van die kind wees. Voorbeelde is:

  • ‘n kategese les vir Graad 1 en hulle gesinne oor hoe elkeen vir God spesiaal is en God altyd by ons is
  • ‘n kategese les met ouers en Graad 7’s oor groepsdruk en hantering van vrese as voorbereiding vir hoërskool
  • ‘n byeenkoms in Lydenstyd, Pinkster, Koninkrykstyd of Advent om oor die kerkjaar te gesels en iets te maak vir die huis daaroor
  • ‘n kategese les vir Graad 4-6 ouers oor huisgeloof tyd
  1. Graadbyeenkoms

Tydens hierdie byeenkoms waar kinders (graad 4-6) “rapporte” (m.a.w. terugvoer) gee vir ouers oor hulle sterkpunte (en waaraan hulle kan werk). Dit word positief gedoen met sinne wat bloot op die rapport omkring word – hierdie dien as gespreksaanknoopspunte en is ‘n goeie hulpmiddel vir eerlike gesprek oor verhoudings en gesinsdinamika.

  1. Nagmaal

Vier nagmaal in gesinsverband. Dit kan om tafels gebeur of bloot in groepe in die kerkbanke. Skep geleentheid waar almal vir mekaar kan vertel wat die betekenis van nagmaal is en die nagmaal ook aan mekaar kan bedien (dit word ingestel en begelei deur ‘n voorganger). Dit is ook ‘n wonderlike geleentheid om vir mense te leer om vir mekaar te bid en mekaar te seën (ondersteun hulle deur vir hulle die woorde of ‘n riglyn te gee, want dit kom nie vir almal maklik nie).

Hierdie is saamgestel deur die Familie Netwerk groep wat op 26 Oktober 2018 te Stellenbosch byeengekom het. Die Familie Netwerk kom gereeld bymekaar om artikels te bespreek en “best practices” te identifiseer wat gemeentes kan help met Familie bediening.

Kersfees is ‘n Jesusfees   

Kersboek vir gesinne om betekenisvol saam fees te vier       

Op julle merke … vertel … versier … vier!

Deur Chrissie Kritzinger

Gesinstradisies word mettertyd omskep in die kosbaarste kindertydherinneringe wat kinders waarskynlik eendag weer in hul eie gesinne sal toepas. Kersfees is ’n Jesusfees is geskryf met die hoop dat ’n nuwe tradisie van betekenisvolle Kersfees-rituele in gesinne sal posvat. Hoewel die belangrikste elemente die saamgesels, bid en sing is, sal die handaktiwiteite baie waardevol wees om die boodskap te herhaal, en boonop die jongspan heeldag besig hou!

Bonus: ’n Gratis CD met nuwe sowel as ou bekende kersliedere asook foto’s en instruksies wat aktiwiteite verduidelik. (more…)

Hoe vorder die gesprek oor Jong Volwassenes in jou gemeente?

Gebruik hierdie vrae in die ring of kerkraad om te luister en te evalueer hoe die gesprek oor Jong Volwassenes (s.g. millennials) vorder….

  • Vertel wat jy/julle gedoen het om te ontdek wat jongmense nodig het?
  • Of vertel van ‘n keer toe jy/julle jongmense betrek het?

Dalk het jy:

  • Doelbewus met ‘n millennial gesels?
  • Die plakker uitdaging gedoen? (deel ‘n wacky Wednesday burger special, koop data, speel ‘n bordspeletjie, stap in die natuur, maak saam kos)*
  • Die poskaarte gebruik met die verhale van millennials agterop?*
  • ‘n gesprek gereël in jou ring of dorp oor of met jong volwassenes
  • ‘n Vergadering beplan met millennials op die agenda
  • ‘n Jong predikant, Jeugwerker of theologies student genooi of leer ken
  • ‘n Kursus bygewoon, ‘n artikel of boek gelees of ‘n youtube video gekyk oor die millennial generasie of die toekoms van die kerk
  • ‘n Jonger persoon betrek by ‘n diensgroep, kommissie, bediening of projek
  • ‘n Jong volwassenes betrek by die kerkraad of ander leiersgroep

Vrae en voorbeelde stamgestel deur die Jong Volwasse Leer Gemeenskap 2018.

*Die “Gotta Love Millennials” plakker uitdaging en die poskaarte kan in elektronies formaat gratis aangevra word by jeug@sun.ac.za.

Gotta Love Millennials

Die Jong Volwasse Leer Gemeenskap stel ‘n uitdaging aan gemeentes om in ‘n erediens gemeentelede uit te daag om gesprekke aan te koop met naskoolse jongmense in en buite die kerk. die rede daarvoor is dat jongmense dikwees ervaar dat daar nie vir hulle ruimte gesleep word in die kerk nie, en dat hulle graag na geluister wil word.  As aanknopingspunt word ‘n plakker met ‘n uitdaging vir elke gemeentelid uitgedeel met een van die volgende uitdagings:

  1. Gaan eet ‘n Wacky Wednesday burger by Steers saam met ‘n Millennial
  2. Gee vir ‘n Millennial ‘n praat kans in die erediens
  3. Doen ‘n buitelug aktiviteit saam met ‘n Millennial
  4. Speel ‘n bordspeletjie saam met ‘n Millennial
  5. Maak kon saam met Millennials
  6. Koop data vir ‘n Millennial

Die plakkers kan in elektronies formaat aangevra word deur ‘n epos te stuur aan jeug@sun.ac.za.

 

 

10 wenke om jong volwassenes te betrek by eredienste

Hierdie is ’n uitdaging wat by jul eredienskomissie (of beplanningsgroep) gebruik kan word om volhoubaar nuut te dink oor die insluiting van jong volwassenes by jul eredienste:

  1. Nooi jong volwassenes om op die erediens kommissie te dien.
  2. Laat ’n jong volwassene die erediens begin met gebed. Of laat jongvolwassenes gebede voorlees of voorbidding vir bepaalde sake doen.
  3. Laat ’n jong volwassene die Bybelteks vir die erediens lees.
  4. Vra 5 jong volwassenes vir liturgie idees, voorbeelde, stories, musiek of fotos wat by die tema van jou volgende preek pas end gebruik kan word in die erediens.
  5. Kry ’n jong volwassene om die liedere te kies vir die erediens of om die sang te lei.
  6. Laat jong volwassenes die nagmaal tekens uitdeel.
  7. Laat ’ n jong volwassene die afkondigings hanteer.
  8. Kies jong volwassenes om mense by die kerk te verwelkom.
  9. Kies 5 jong volwassenes om tydens ’n erediens hul ervarings van daardie diens neer te skryf en dit daarna met jou / mekaar te deel.
  10. Vra ‘n jong volwassene om vanuit sy/haar leefwêreld ‘n getuienis ted eel wat by die tema van die diens aansluit.

Hierdie wenke is saamgestel deur Etienne Snyman as deel van die Jong Volwasse Leer Gemeenskap se nadenke.

12 idees vir die familiebediening in jou gemeente

Maak vandag ‘n begin om jou gemeente as geloofsfamilie te versterk deur ook gesinne te bedien. Hier is ‘n paar eenvoudige idees:

  1. Plaas familie-wenke op jou bulletin – iets wat families saam kan doen of oor gesels in die week
  2. Stuur ‘n boodskap aan ouers (via WhatsApp, SMS of epos) of plaas in die bulletin waaroor die kategese inhoud gehandel het, sodat ouers en kinders saam daaroor kan gesels.
  3. Bied ouertoerusting aan oor relevante onderwerpe tydens kategese, na ‘n erediens of op ‘n weeksaand. Onthou om kinderoppassers te reël.
  4. Hou informele ouergesprekke oor ‘n koppie koffie oor ‘n verskeidenheid onderwerpe. Die doel is nie toerusting of inligting deel nie, maar om ‘n ruimte vir gesprek, bemoediging en ondersteuning te skep.
  5. Herdink die inhoud van die doopgesprek of bied ‘n dooptoerusting geleentheid aan.
  6. Bied ‘n voorhuwelikse of huweliksverryking kursus aan of nooi ‘n spreker.
  7. Hou ‘n familie kamp. Besluit vooraf oor die rede vir die kamp (bloot lekker saamkuier geleentheid of ook toerusting vir families oor huisgeloof) en kommunikeer dit duidelik.
  8. Netwerk met sielkundiges, maatskaplike werkers en ander diensorganisasies sodat jy weet hoe en waarheen gesinne in nood te verwys.
  9. Hou ‘n gemeente ete wat fokus om jonk en oud aan mekaar te verbind. Laat gemeentelede ook mense buite die gemeente nooi.
  10. Gebruik 40 dae reekse om ook gesinne in kleingroepe of byeenkomste byeen te bring waarin kinders welkom en deel is.
  11. Skep geleenthede waar ouers wat nie gewoonlik deel vorm van kategese nie, genooi word. Gebruik die geleenthede om huisgeloof praktyke te vestig.
  12. Vier roetemerkers, soos oorgangstye (Gr 1, Gr 8, nuwe werk, nuwe intrekkers, ens), verliese (iemand oorlede, werkloosheid), hartseer tye (siekte ens.), oorwinnings en spesiale dae met rituele wat almal herinner dat God deel is van die alledaagse lewe.

Geskryf deur Anriëtte de Ridder 

Nog 10 wenke om kinders te betrek in ‘n interaktiewe erediens (deel 2)

Inter-ouderdom dienste betrek oud en jonk

‘n Inter-ouderdom, interaktiewe erediens fokus om alle gemeentelede aan mekaar te verbind. In die loop van die erediens en preek word daar geleenthede geskep waar mense van verskillende ouderdomme met mekaar kan saam gesels of iets saam kan doen. Dit is nie ‘n kinderdiens nie, maar ‘n geleentheid om saam te groei as gelowiges in een geloofsfamilie.

Nog 10 wenke om die erediens en preek interaktief te maak:

(more…)

12 Wenke om oud en jonk aan mekaar te verbind in jou gemeente

Hoe kan huidige ruimtes of geleenthede anders ingerig word om verskillende mense en generasies aan mekaar te verbind?  

Hier is 12 wenke:

  1. Kampe is ‘n wonderlike geleentheid om inter-ouderdom spasies te skep waar verskillende generasies kan “connect” aan mekaar, maar dan moet almal deelneem (daar moenie deelnemers en toeskouers wees nie). Skep rolle vir allerlei mense (nie net kategete nie, maar ook studente, middeljariges en ouer mense) en gee vir almal verantwoordelikhede, sodat almal met ‘n doel gaan.
  2. Kinder vakansie programme kan ook só aangebied word sodat kinders, tieners en volwassenes betrek word en beide tieners én volwassenes die kinders dien. Om saam te werk na ‘n gemeenskaplike doel bind mense saam.
  3. #imagine is ‘n ideale geleentheid om ‘n hele gemeente te betrek om saam te gaan kamp en verhoudings te bou. Skep ‘n gesamentlike doel soos om te help by die gebedstasies (#imagine se “encounter stations”).
  4. Betrek gesinne / huishoudings by huidige diensprojekte of uitreike sodat hulle leer om ook saam ‘n verskil te maak bv. om families te nooi om saam broodjies te kom smeer vir ‘n plaaslike sopkombuis of ouers saam te nooi op ‘n jeug uitreik.
  5. Betrek die hele familie as eredienswerkers of om mense by die deure te verwelkom. Gee vir hulle toerusting sodat hulle byvoorbeeld ook leer om kinders te groet (byvoorbeeld met ‘n “high five” of “fist pump”).
  6. Laat kinders saam met ouers die nagmaaltekens uitdeel.
  7. Benader tradisionele gemeente sang op ‘n heel ander manier. “Blended worship” is ‘n uitdaging, maar tog kan ‘n mens nie net die erediens laat besit deur sekere ouderdom mense nie. Een styl kan nie oorheers nie. As dit ons kerk begrip is dat ons álmal wil verwelkom en tuiskom in die erediens, moet ons ook bereid wees om nuut te dink oor die keuse, styl en samestelling van die liedere.
  8. Betrek kinders en tieners by die begeleidingsgroep.
  9. Reël ‘n  inter-ouderdom staptoer of uitstappie waar volwassenes jongmense op ‘n ander manier kon leer ken en wedersydse verhoudings gebou kon word.
  10. Gebruik en bevestig tieners as leiers in die gemeente bv. as kerkraasdslede of op kommissies of as jeug leierspan. Dit gee vir hulle ook ‘n stem en deurdat hulle diensbaar is en verantwoordelikheid neem, groei hulle ook. Dit is egter belangrik om met dié tiener leiers tyd te spandeer en verhoudings te bou en hulle nie net alleen te laat nie.
  11. Nooi volwassenes wat nie by die kategese betrokke is nie, om die kategese groep te kom besoek. Hulle kan byvoorbeeld hulle ervaring of stories (ook stories van gebrokenheid of foute) te deel met die tieners. Op só manier kan tieners ook verhoudings met ander volwassenes bou.
  12. Gebruik tieners as leiers (of hulpleiers) by die kategese en by kampe. so kan hulle reeds vroeg leer dien en lei.

Saamgestel deur die Familie Netwerk, ‘n inisiatief van die Taakspan Jeug en Familie van die Sinode van Wes-Kaapland.

12 Wenke om families te laat tuiskom in jou gemeente

Die lede van die  Familie Netwerk het aan 12 wenke gedink om gemeentes meer familie vriendelik in te rig (overal vir nuwe persone en besoekers):

  1. Gebruik foto’s van verskillende rasse en tipe families in PowerPoint
  2. Let op taal – verwelkom byvoorbeeld alle ouderdomme persone, noem altyd waar die kleedkamers en ruimtes vir klein kinders is, sodat besoekers maklik tuis kan kom
  3. Let op hoe die voorportaal lyk– is daar byvoorbeeld foto’s van kinders op die mure, is dit rolstoel vriendelik?
  4. Betrek bejaardes by die jeug- of kinderbediening deur geleenthede te skep vir stories vertel. Spesifieke geleenthede kan hiervoor gereël word of huidige geleenthede kan hiervoor ingespan word.
  5. Hang foto’s van die kategese groepe in die voorportaal – dit gee vir kinders / jongmense die boodskap gee dat hulle belangrik is en welkom is.
  6. Pak klein tafeltjies, stoeltjies, Kinderbybels en inkleur goed in die erediens ruimte uit – dit laat voorskoolse kinders welkom voel en bevorder hulle deelname.
  7. ‘n Klimraam of bordkryt buite en ‘n tafel met koeldrank kan kleiner kinders laat tuiskom terwyl ouers saamkuier na ‘n erediens.
  8. Benoem ‘n moederskamer eerder “ruimte vir ouers met babas” en kyk of die ruimtes voldoende is en vriendelik is
  9. Is daar genoeg aanwysings sodat besoekers weet waar alles is? Is dit in verstaanbare terme?
  10. Doen weeklikse verjaarsdae vieringe met sjokolade of ‘n kaartjie – kry tieners om te help om dit uit te deel.
  11. Gebruik die kinderoomblik of familietyd in die erediens om huisgeloof aktiwiteite in te oefen – so word huisgesinne / -houdings versterk.
  12. Gebruik verskillende ouderdom, geslag en tipe personen om getuienisse te gee of ‘n gebed te doen / voor te lees in die erediens.

Die Familie Netwerk is ‘n inisiatief van die Jeug en Familie Taakspan van die Sinode van Wes Kaapland.

Hoe kan ‘n gemeente ‘n familie raak? (deel 2)

Nog gespreksnotas van die Familie Netwerk byeenkoms gehou op 19 Julie 2018 aan die hand van ‘n hoofstuk “Congregations as Family” in die boek “Passing on the Faith. A Radical New Model For Youth and Family Ministry” deur Merton P. Strommen en Richard A. Hardel. 

“Gemeentes het nie bloot ‘n “familiebediening” nie, maar ís ook in geheel ‘n familiebediening”.

Hierdie was die onderwerp van die onlangse Familie Netwerk gesprek. Dié gesprek het daartoe gelei dat ons besef het dat gemeentes nuut moet dink oor hoe hulle ruimtes, atmosfeer en geleenthede ingerig word sodat almal deel kan voel van die gemeente as groter familie.  Dikwels word kinders slegs verdra in die erediens, eerder as wat die erediens ook aan hulle behoort. Maar waar begin ‘n mens die kultuur in ‘n gemeente skuif?

Ons voorstel is dat jy ‘n gespreksgeleentheid met die Kerkraad of met leiers van die gemeente reël en die volgende vrae vra:

(more…)

Hoe kan ‘n gemeente ‘n familie raak (deel 1)

Gespreksnotas (deel 1) van die Familie Netwerk byeenkoms gehou op 19 Julie 2018 aan die hand van ‘n hoofstuk “Congregations as Family” in die boek “Passing on the Faith. A Radical New Model For Youth and Family Ministry” deur Merton P. Strommen en Richard A. Hardel.

 Is familiebediening ‘n afdeling van gemeente-wees of is ‘n gemeente een groot familie?

Familiebediening is beide‘n afdeling van gemeente-wees én die gemeente is ook een groot familie. Daarom beteken familiebediening dat ons twee dinge doen:

(more…)

Is familiebediening ‘n afdeling van gemeente-wees of is ‘n gemeente een groot familie?

Gespreksnotas van die Familie Netwerk byeenkoms gehou op 19 Julie 2018 aan die hand van ‘n hoofstuk “Congregations as Family” in die boek “Passing on the Faith. A Radical New Model For Youth and Family Ministry” deur Merton P. Strommen en Richard A. Hardel.

 Familiebediening is beide‘n afdeling van gemeente-wees én die gemeente is ook een groot familie. Daarom beteken familiebediening dat ons twee dinge doen:

(more…)

Laerskool Kamp oor verskillende spiritualiteite

Mense ontdek God op verskillende maniere en dit is belangrik dat ons kinders bloot stel aan ‘n verskeidenheid van spiriritualiteitstyle. Wat is die 4 tipe spiritualiteite? In kort is daar mense wat hoofsaaklik groei deur kennis (kop spiritualiteit), ander ervaar God deur interaksie en emosie (hart spiritualiteit), ander ontmoet God deur iets diensbaar te doen (hand spiritualiteit) en ander ontdek weer God deur simboliek en nadenke (vlam spiritualiteit). Kinders is nog te jonk om te onderskei wat hulle voorkeur is. Hulle is ook te jonk om die teorie daarvan werklik te verstaan, dus is die praktyk belangriker as die teorie.  Spiritualiteite is ook nie ‘n verskoning om God net op een manier te aanbid nie – dikwels groei on sook wanneer ons buite ons gemaksone is.  Dit is dus belangriker dat jy hulle aan al 4 spiritualiteits tipes blootstel sodat hulle self kan ervaar hoe ‘n mens God op verskillende maniere kan aanbid. Terselfdetyd sal die volwasse leiers bewus raak van hulle eie voorkeure en kan hulle juis opnuut fokus om tyd vir al 4 te maak tydens ‘n kamp (of tydens kategese).

Laai HIER ‘n riglyn af van hoe só ‘n kamp saamgestel kan word. Dit is saamgestel deur ds Marietjie Steyn (van Bloubergstrand Gemeente)

Vinnig gedink oor Kamp menu’s

Heelwat Kamptereine bied deesdae spyseniering aan saam met hulle verblyf, maar dit is nie altyd bekostigbaar nie.  Elke gemeente het ook nie altyd ‘n “kostannie” wat kans sien om saam te gaan kamp om die kos te maak nie.

Om die honger skares te voed is nie so moeilik soos wat dit soms klink nie, en dit is moontlik om lekker te eet vir min geld.  Hier volg ‘n paar idees oor Spyskaarte wat kan help.

  • Hou die ouderdom en geslagsverdeling in gedagte met die beplanning van die spyskaart. Laerskool kinders eet nie so baie nie en hoërskool seuns raak nooit vol nie!  ‘n Bak vrugte wat op ‘n tafel staan vir ‘n tussen in knibbel is altyd ‘n goeie idee.  Ons vra altyd dat kampers ‘n sak vrugte of pakkie koekies saambring vir die kombuis, en ons gebruik dit vir tussen in happies.
  • Beplan die spyskaart so dat die een ete se oorskiet deel van die volgende ete se bykosse kan word. Vrydag aand se oorskiet worsies kan in ‘n volgende ontbyt se roereier opgesny word, terwyl ekstra broodrolletjies knoffel en botter kan kry vir ‘n bykos vir Spaghetti Bolognaise.  Oorskiet Spaghetti Bolognaise maak heerlike ontbyt broodjies.
  • Jongmense hou daarvan as die tema van die kamp weerspieël word in die kos wat geëet word. Tydens ‘n kamp wat gehandel het oor die vervolgde kerk, is Midde Oosterse kos(pitabroodjies met frikadelle) vir middagete voorgesit, en groenterys met hoender vir aandete, met Chinese stokkies om mee te eet in plaas van messe en vurke.
  • ‘n Naweek is net ‘n naweek, en jongmense verkies “gemorskos” op ‘n naweek bo gebalanseerde etes, so jy hoef nie baie bekommerd te wees as elke ete stysel bevat nie. (hou net tred met jongmense wat allergiëe het)
  • Idees vir laerskool kampe
  • Koffie vir laerskool kinders is eintlik onnodig, maar as jy koffie wil gee, gee dit net soggens. Ek maak altyd ‘n kan koffie met melk in, en kinders kan hul eie suiker ingooi.
  • Weens gesondheidsredes word die drink van energiedrankies ontmoedig, asook gaskoeldrank laatmiddag en saans.
  • Laerskool kinders hou van kompetisies, en dit werk lekker om die kinders in groepe te laat tafels dek vir ‘n ete, of te help voorberei deur bv hul eie nagereg in groepe te maak.
  • Laerskool kinders hou baie daarvan om hul eie stokbrood of roosterkoek te maak vir ete
  • Idees vir hoërskool kampe
  • Potjiekos/masterchef kompetisies tussen groepe
  • Kampers kan help met die voorbereiding en opruiming
  • Ete voorbereiding kan gekoppel word aan ‘n diensaksie, waar kos voorberei word om uitgedeel te word in ‘n gemeenskap
  • Maklike ete idees

Worsbroodjies, Eenskottel rys, maalvleis en groente gereg, Spaghetti Bolognaise, Gebraaide wors of hoender, Aartappelslaai, wortelslaai, Mengelslaai, Roosterkoek, gevulde vetkoek

 

Kampe bly ‘n effektiewe manier van bediening, en is al die beplanning en voorbereiding werd!

18 going on… Jongvolwassene wat werk?

Millenials of millenni-mal, noem dit wat jy wil, maar jongvolwassenes is een prioriteit wat blyk om konstant geïgnoreer word. Is dit omdat ons al te lank met ons hande in ons hare sit of is dit omdat hierdie spesie (waarbinne ek self val) net te vreemd is. Ongeag die rede, niemand gaan die ouderdomsgroep tussen 18 en 35 ontglip nie en of jy gemaklik is daarmee of nie, as bedienaars moet ons bedien. Nou wat gemaak?

Na aanleiding van onlangse gesprek tussen bedienaars wat val binne hierdie ouderdom het, ons die volgende “best practices” identifiseer:

  • Bier en Bybel

NGK Bergsig in Durbanville het ʼn bediening begin vir jongmense wat kerklos geraak het. Dit het begin met ʼn groep vriende wat saam Bybel begin lees het in ʼn kroeg een keer ʼn week. Hulle het drie beginsels geïdentifiseer waarvolgens hierdie “kleingroep” funksioneer nl.:

  1. Luister as ʼn ander praat
  2. Ons mag verskil
  3. Niemand praat asof hulle meer weet as die ander nie.

Hoewel hierdie groep die verhale in die Bybel bespreek, is die raamwerk van so aard dat ongelowiges ook saam kan gesels en kuier. Die vrae word so gestel dat enige iemand daarop kan reageer. Die drie vrae wat gereeld gevra word vanuit die teks is:

  1. Wat leer ons van die karakter van God
  2. Wat leer ons van mekaar
  3. Wat leer ons van onsself?

Hierdie groep het uitgebrei na twee groepe wat elk een keer ‘n week bymekaar kom. Soms by kroeë en soms by mekaar se huise.

  • Kursus vir Jongvolwassenes

NGK Sonstraal in Durbanville het ʼn 5-weke-kursus aangebied met die doel om jongvolwassenes uit verskillende agtergronde bymekaar te bring rondom ʼn universele vraag. Die kursus is aangebied by ʼn neutrale plek – nie by die kerk nie, maar eerder ʼn koffiewinkel.

Hulle het een keer per week bymekaar gekom en ook saam geëet. Die aand was gestruktureer sodat enige iemand welkom sou voel, gelowig, ongelowig of soekend.

  • Jongwerkendes op die platteland

In Kimberley, het die NG kerke gesukkel om aparte jongwerkende bedieninge van die been af te kry. Dit het tot gevolg gehad dat ‘n paar van die kerke saamgespan het om een jongwerkende geleentheid, een keer per week saam te hou. Die idee was dat dit interdenominaal is en almal hul vriende saam nooi. Die hooffokus was op verhoudings. Daarom was daar net speletjies gespeel, saam geëet en gesels vir die eerste drie weke. Na die eerste drie weke, het elke gemeente om die beurt verantwoordelikheid geneem vir reëlings, maar steeds was die byeenkoms gesamentlik gehou en by ‘n neutrale plek.

  • Mamma-groep

NGK Bergsig in Durbanville het die behoeftes raakgesien by jong mammas om net bymekaar te kom en lewens-stories te deel. Hierdie groep bestaan uit mammas wat tuis is, sommiges steeds op kraamverlof en sommiges is werkend met flexi-ure. Hierdie groep kom een keer ‘n week bymekaar en die agenda mag verander volgens die behoefte van die groep. Somtyds is dit slegs ‘n ruimte om na mekaar te luister, soms om mekaar te dien en soms om saam te lees en te leer uit die Bybel.

Hierdie is slegs enkele voorbeelde en sal nie noodwendig in jou spesifieke konteks werk nie, maar almal moet iewers begin. Hopelik inspireer dit jou om vars te kyk na nuwe en kreatiewe bedienings moontlikhede. Millenial, milleni-mal of millenni-nou…

 

Geskryf deur Jana Dickason, jeugleraar Durbanville Gemeente na aanleiding van ‘n energiegesprek oor Jongvolwassenes gehou 20 Septemeber 2016. Hierdie energiegesprekke word gereël deur die Sinode van Wes-Kaap se Taakspan vir Jeug en Familiebediening.