intergeneratief

Kerk + huis deur Mark Holmen

Mark Holmen se boek “Kerk+ Huis. Die Beproefde formule om lewenslange geloof te bou” bied ‘n eenvoudige huisgeloof strategie vir gemeentes.

Blywende, lewenslange geloof word selde deur kerkprogramme aangeleer, maar eerder “aangesteek” deur ’n leefstyl van geloof wat by die huis uitgeleef word. Maar hoe kan jou gemeente huise toerus om (weer) die belangrikste plek te word waar geloof gevoed word? Deur ’n HuisGeloof-gemeente te word. Mark Holmen se boek Kerk + Huis bevat alles wat jy nodig het om ’n HuisGeloof-fokus in die DNS van jou geloofsgemeenskap in te weef.

Kerk + Huis bou voort op die bedieningskonsepte wat Holmen deur die vinnig groeiende, internasionale HuisGeloof-beweging verfyn het. Jy sal ontdek hoe om jou gemeentelede se huise as die belangrikste geboorteplek van geloof te hervestig deur ’n lewenskragtige, doeltreffende HuisGeloof-bediening in jou gemeente te vestig, ongeag hoe groot of klein dit is.

Jy kan die boek, in afrikaans vertaal, bestel by Bybelmedia: http://eshop.bybelmedia.org.za/product/kerkhuis/

By hierdie skakel is daar ook ‘n nuttige boekresensie deur Dr Wouter van Wyk gratis aflaaibaar.

10 wenke om jong volwassenes te betrek by eredienste

Hierdie is ’n uitdaging wat by jul eredienskomissie (of beplanningsgroep) gebruik kan word om volhoubaar nuut te dink oor die insluiting van jong volwassenes by jul eredienste:

  1. Nooi jong volwassenes om op die erediens kommissie te dien.
  2. Laat ’n jong volwassene die erediens begin met gebed. Of laat jongvolwassenes gebede voorlees of voorbidding vir bepaalde sake doen.
  3. Laat ’n jong volwassene die Bybelteks vir die erediens lees.
  4. Vra 5 jong volwassenes vir liturgie idees, voorbeelde, stories, musiek of fotos wat by die tema van jou volgende preek pas end gebruik kan word in die erediens.
  5. Kry ’n jong volwassene om die liedere te kies vir die erediens of om die sang te lei.
  6. Laat jong volwassenes die nagmaal tekens uitdeel.
  7. Laat ’ n jong volwassene die afkondigings hanteer.
  8. Kies jong volwassenes om mense by die kerk te verwelkom.
  9. Kies 5 jong volwassenes om tydens ’n erediens hul ervarings van daardie diens neer te skryf en dit daarna met jou / mekaar te deel.
  10. Vra ‘n jong volwassene om vanuit sy/haar leefwêreld ‘n getuienis ted eel wat by die tema van die diens aansluit.

Hierdie wenke is saamgestel deur Etienne Snyman as deel van die Jong Volwasse Leer Gemeenskap se nadenke.

Huisgeloof en die senior lidmaat

Hoekom senior lidmate betrek by huisgeloof?

Huisgeloof is nie net ‘n kinder- of gesinsbediening program nie, maar ʼn manier om kerk te doen.  Ons eerste gedagte aan huisgeloof is hoe ons ouers kan help om geloofsvorming by die huis te kan doen, maar geloofsvorming is ʼn lewenslange proses wat alle ouderdomme insluit.

(more…)

Wat is huisgeloof?

Die term “huisgeloof” word deesdae dikwels gebruik. Waarna verwys dit?

Gemeentes ontdek vandag opnuut dat geloofsvorming grootliks by die huis plaasvind. Jare lank het mense gedink ’n mens neem jou kinders kerk toe en daar leer hulle primêr van God. Vandag besef ons die huis en kerk vorm ’n span en albei hierdie ruimtes is belangrik vir geloofsvorming.

Huisgeloof verwys na gesinne (mense wat saam in ’n huishouding woon) wat saam hulle geloof uitleef en beoefen.

(more…)

12 idees vir die familiebediening in jou gemeente

Maak vandag ‘n begin om jou gemeente as geloofsfamilie te versterk deur ook gesinne te bedien. Hier is ‘n paar eenvoudige idees:

  1. Plaas familie-wenke op jou bulletin – iets wat families saam kan doen of oor gesels in die week
  2. Stuur ‘n boodskap aan ouers (via WhatsApp, SMS of epos) of plaas in die bulletin waaroor die kategese inhoud gehandel het, sodat ouers en kinders saam daaroor kan gesels.
  3. Bied ouertoerusting aan oor relevante onderwerpe tydens kategese, na ‘n erediens of op ‘n weeksaand. Onthou om kinderoppassers te reël.
  4. Hou informele ouergesprekke oor ‘n koppie koffie oor ‘n verskeidenheid onderwerpe. Die doel is nie toerusting of inligting deel nie, maar om ‘n ruimte vir gesprek, bemoediging en ondersteuning te skep.
  5. Herdink die inhoud van die doopgesprek of bied ‘n dooptoerusting geleentheid aan.
  6. Bied ‘n voorhuwelikse of huweliksverryking kursus aan of nooi ‘n spreker.
  7. Hou ‘n familie kamp. Besluit vooraf oor die rede vir die kamp (bloot lekker saamkuier geleentheid of ook toerusting vir families oor huisgeloof) en kommunikeer dit duidelik.
  8. Netwerk met sielkundiges, maatskaplike werkers en ander diensorganisasies sodat jy weet hoe en waarheen gesinne in nood te verwys.
  9. Hou ‘n gemeente ete wat fokus om jonk en oud aan mekaar te verbind. Laat gemeentelede ook mense buite die gemeente nooi.
  10. Gebruik 40 dae reekse om ook gesinne in kleingroepe of byeenkomste byeen te bring waarin kinders welkom en deel is.
  11. Skep geleenthede waar ouers wat nie gewoonlik deel vorm van kategese nie, genooi word. Gebruik die geleenthede om huisgeloof praktyke te vestig.
  12. Vier roetemerkers, soos oorgangstye (Gr 1, Gr 8, nuwe werk, nuwe intrekkers, ens), verliese (iemand oorlede, werkloosheid), hartseer tye (siekte ens.), oorwinnings en spesiale dae met rituele wat almal herinner dat God deel is van die alledaagse lewe.

Geskryf deur Anriëtte de Ridder 

Nog 10 wenke om kinders te betrek in ‘n interaktiewe erediens (deel 2)

Inter-ouderdom dienste betrek oud en jonk

‘n Inter-ouderdom, interaktiewe erediens fokus om alle gemeentelede aan mekaar te verbind. In die loop van die erediens en preek word daar geleenthede geskep waar mense van verskillende ouderdomme met mekaar kan saam gesels of iets saam kan doen. Dit is nie ‘n kinderdiens nie, maar ‘n geleentheid om saam te groei as gelowiges in een geloofsfamilie.

Nog 10 wenke om die erediens en preek interaktief te maak:

(more…)

12 Wenke om oud en jonk aan mekaar te verbind in jou gemeente

Hoe kan huidige ruimtes of geleenthede anders ingerig word om verskillende mense en generasies aan mekaar te verbind?  

Hier is 12 wenke:

  1. Kampe is ‘n wonderlike geleentheid om inter-ouderdom spasies te skep waar verskillende generasies kan “connect” aan mekaar, maar dan moet almal deelneem (daar moenie deelnemers en toeskouers wees nie). Skep rolle vir allerlei mense (nie net kategete nie, maar ook studente, middeljariges en ouer mense) en gee vir almal verantwoordelikhede, sodat almal met ‘n doel gaan.
  2. Kinder vakansie programme kan ook só aangebied word sodat kinders, tieners en volwassenes betrek word en beide tieners én volwassenes die kinders dien. Om saam te werk na ‘n gemeenskaplike doel bind mense saam.
  3. #imagine is ‘n ideale geleentheid om ‘n hele gemeente te betrek om saam te gaan kamp en verhoudings te bou. Skep ‘n gesamentlike doel soos om te help by die gebedstasies (#imagine se “encounter stations”).
  4. Betrek gesinne / huishoudings by huidige diensprojekte of uitreike sodat hulle leer om ook saam ‘n verskil te maak bv. om families te nooi om saam broodjies te kom smeer vir ‘n plaaslike sopkombuis of ouers saam te nooi op ‘n jeug uitreik.
  5. Betrek die hele familie as eredienswerkers of om mense by die deure te verwelkom. Gee vir hulle toerusting sodat hulle byvoorbeeld ook leer om kinders te groet (byvoorbeeld met ‘n “high five” of “fist pump”).
  6. Laat kinders saam met ouers die nagmaaltekens uitdeel.
  7. Benader tradisionele gemeente sang op ‘n heel ander manier. “Blended worship” is ‘n uitdaging, maar tog kan ‘n mens nie net die erediens laat besit deur sekere ouderdom mense nie. Een styl kan nie oorheers nie. As dit ons kerk begrip is dat ons álmal wil verwelkom en tuiskom in die erediens, moet ons ook bereid wees om nuut te dink oor die keuse, styl en samestelling van die liedere.
  8. Betrek kinders en tieners by die begeleidingsgroep.
  9. Reël ‘n  inter-ouderdom staptoer of uitstappie waar volwassenes jongmense op ‘n ander manier kon leer ken en wedersydse verhoudings gebou kon word.
  10. Gebruik en bevestig tieners as leiers in die gemeente bv. as kerkraasdslede of op kommissies of as jeug leierspan. Dit gee vir hulle ook ‘n stem en deurdat hulle diensbaar is en verantwoordelikheid neem, groei hulle ook. Dit is egter belangrik om met dié tiener leiers tyd te spandeer en verhoudings te bou en hulle nie net alleen te laat nie.
  11. Nooi volwassenes wat nie by die kategese betrokke is nie, om die kategese groep te kom besoek. Hulle kan byvoorbeeld hulle ervaring of stories (ook stories van gebrokenheid of foute) te deel met die tieners. Op só manier kan tieners ook verhoudings met ander volwassenes bou.
  12. Gebruik tieners as leiers (of hulpleiers) by die kategese en by kampe. so kan hulle reeds vroeg leer dien en lei.

Saamgestel deur die Familie Netwerk, ‘n inisiatief van die Taakspan Jeug en Familie van die Sinode van Wes-Kaapland.

12 Wenke om families te laat tuiskom in jou gemeente

Die lede van die  Familie Netwerk het aan 12 wenke gedink om gemeentes meer familie vriendelik in te rig (overal vir nuwe persone en besoekers):

  1. Gebruik foto’s van verskillende rasse en tipe families in PowerPoint
  2. Let op taal – verwelkom byvoorbeeld alle ouderdomme persone, noem altyd waar die kleedkamers en ruimtes vir klein kinders is, sodat besoekers maklik tuis kan kom
  3. Let op hoe die voorportaal lyk– is daar byvoorbeeld foto’s van kinders op die mure, is dit rolstoel vriendelik?
  4. Betrek bejaardes by die jeug- of kinderbediening deur geleenthede te skep vir stories vertel. Spesifieke geleenthede kan hiervoor gereël word of huidige geleenthede kan hiervoor ingespan word.
  5. Hang foto’s van die kategese groepe in die voorportaal – dit gee vir kinders / jongmense die boodskap gee dat hulle belangrik is en welkom is.
  6. Pak klein tafeltjies, stoeltjies, Kinderbybels en inkleur goed in die erediens ruimte uit – dit laat voorskoolse kinders welkom voel en bevorder hulle deelname.
  7. ‘n Klimraam of bordkryt buite en ‘n tafel met koeldrank kan kleiner kinders laat tuiskom terwyl ouers saamkuier na ‘n erediens.
  8. Benoem ‘n moederskamer eerder “ruimte vir ouers met babas” en kyk of die ruimtes voldoende is en vriendelik is
  9. Is daar genoeg aanwysings sodat besoekers weet waar alles is? Is dit in verstaanbare terme?
  10. Doen weeklikse verjaarsdae vieringe met sjokolade of ‘n kaartjie – kry tieners om te help om dit uit te deel.
  11. Gebruik die kinderoomblik of familietyd in die erediens om huisgeloof aktiwiteite in te oefen – so word huisgesinne / -houdings versterk.
  12. Gebruik verskillende ouderdom, geslag en tipe personen om getuienisse te gee of ‘n gebed te doen / voor te lees in die erediens.

Die Familie Netwerk is ‘n inisiatief van die Jeug en Familie Taakspan van die Sinode van Wes Kaapland.

Hoe kan ‘n gemeente ‘n familie raak? (deel 2)

Nog gespreksnotas van die Familie Netwerk byeenkoms gehou op 19 Julie 2018 aan die hand van ‘n hoofstuk “Congregations as Family” in die boek “Passing on the Faith. A Radical New Model For Youth and Family Ministry” deur Merton P. Strommen en Richard A. Hardel. 

“Gemeentes het nie bloot ‘n “familiebediening” nie, maar ís ook in geheel ‘n familiebediening”.

Hierdie was die onderwerp van die onlangse Familie Netwerk gesprek. Dié gesprek het daartoe gelei dat ons besef het dat gemeentes nuut moet dink oor hoe hulle ruimtes, atmosfeer en geleenthede ingerig word sodat almal deel kan voel van die gemeente as groter familie.  Dikwels word kinders slegs verdra in die erediens, eerder as wat die erediens ook aan hulle behoort. Maar waar begin ‘n mens die kultuur in ‘n gemeente skuif?

Ons voorstel is dat jy ‘n gespreksgeleentheid met die Kerkraad of met leiers van die gemeente reël en die volgende vrae vra:

(more…)

Hoe kan ‘n gemeente ‘n familie raak (deel 1)

Gespreksnotas (deel 1) van die Familie Netwerk byeenkoms gehou op 19 Julie 2018 aan die hand van ‘n hoofstuk “Congregations as Family” in die boek “Passing on the Faith. A Radical New Model For Youth and Family Ministry” deur Merton P. Strommen en Richard A. Hardel.

 Is familiebediening ‘n afdeling van gemeente-wees of is ‘n gemeente een groot familie?

Familiebediening is beide‘n afdeling van gemeente-wees én die gemeente is ook een groot familie. Daarom beteken familiebediening dat ons twee dinge doen:

(more…)

DIEN SAAM

DIEN SAAM - Hoe kan geleenthede skep waar alle generasies (ouderdomme) saam kan dien? (Gedagtes oor inter-generasionele bediening deel 2) 
Anriëtte de Ridder

Hierdie is deel van ‘n reeks artikels geskryf na aanleiding van die Familie Netwerk gesprek gehou in November 2017 met John Roberto se artikel “Becoming Intentionally Intergenerational” as agtergrond.

Diensbaarheid

Hoe kan diensgeleenthede werklik alle generasies (ouderdomme) saam betrek eerder as wat groepe net apart diensbaar is?

 Beginsels om te onthou

  • Diensbaarheid behels diensbare dade maar ook om dinge eenvoudige saam te doen.
  • Dis makliker om “doen dinge” inter-generasioneel aan te pak as enige ander tipe aktiwiteit of byeenkoms bv leer geleentheid of aanbidding geleentheid.
  • Diversiteit van opsies vir mense is belangrik.
  • “Doen dinge” kan ook avontuur geleenthede insluit waar jy uit jou gemaksone verkeer.
  • Diensbare dade kan ook pret wees vir alle ouderdomme.
  • Wanneer mense van verskillende ouderdomme saam dinge doen of saam diensbaar is, word ervarings gedeel – ervaringsleer beginsels geld dus hier.
  • “Mentoring” is belangrik – mense wat iets reeds gedoen het kan gee raad of help lei.
  • Daar is min geleenthede in die kerk (buiten basaar en eredienste) vir volwassenes om ook saam met ander volwassenes van verskillende ouderdomme iets saam te doen. Diens geleenthede help om sulke platforms te skep.
  • Toerusting vir diens en uitreik is belangrik sodat almal weet wat om te verwag en toegerus is vir dit wat van hulle verwag word.
  • Kinders en ouer mense kan bymekaar leer.
  • Dit is in meeste gemeentes vir gesinne ‘n uitdaging om ‘n geleenthede te vind waar hulle iewers saam kan uitreik, diensbaar wees of ‘n verskil kan maak – gemeentes moet intensioneel sulke saam-dien geleenthede skep.
  • Dit is ook ‘n uitdaging om ruimtes te skep waar gesinne uit verskillende ekonomiese agtergronde met mekaar kan “connect” – ons kan meer hieroor dink en meer intensioneel hieroor wees sodat “diens” nie altyd net eenrigting noodverligting is nie.

Stories

‘n Predikant vertel van gesinne (of kinders saam met ander volwassenes) wat saam uitreik na straatmense met die doel om omgee gesprekke met hulle te hê. By een so ‘n geleentheid het ‘n oupa en kleinseun saam dit gedoen en dit het baie vir hulle beteken om só ‘n ervaring te deel.

Een gemeente gee gesprek kaartjies vir tieners wat die ouetehuis besoek. Kaartjies het eenvoudige kenmekaar vrae op soos “Waar het jy groot geword?”, Watter stories hou jy van?” ens. hierdie vrae help die gesprekke om makliker te vloei. Hul ervaar dat tieners en bejaardes só met mekaar connect dat hulle aan die einde spontaan nommers uit ruil of reël vir ‘n opvolg besoek.

Een persoon vertel van die “Laserus projek – ek hoop / glo / vertrou” waar hulle maandeliks kos aanry na 16 gesinne in die gemeente en kinders saamneem wanneer hulle dit doen.

Een predikant vertel van jongmense wat sy saamgeneem het na ‘n ouetehuis om daar musiek te maak. Dit was ‘n nie-bedreigende manier van konneksie maak met hulle.

Een gemeente hou een maal ‘n jaar n familie Steak ete waar mense eet en verskillende ouderdomme saam skottelgoed was aan die einde.

Iemand vertel van die Embrace projek waar ‘n swanger ma en ouer ma aan mekaar verbind word om saam ‘n pad te stap.

Die Echo huise se saameet geleenthede bring verskillende ouderdomme en ekonomiese groepe bymekaar vir saam eet, kuier asook diens doen.

Nog ‘n storie word vertel van ‘n ete wat gereël is deur ‘n gemeente, waar tieners die bediening gedoen het en mense vanaf die straat genooi is vir ‘n heerlike bederf. Die mense het straatmense, karwagte en werkloses ingesluit.

Nog ‘n storie is vertel van ‘n tiener wat spontaan met die straatmense in sy omgewing connect. Hy ken hulle elkeen se naam en storie, nooi hul kerk toe en gee om vir hulle. Sy storie het ander (ook ouer) persone aangeraak.

Nog Idees

  • Vier (almal saam) dit wat reeds gedoen word in die gemeente in byvoorbeeld die erediens.
  • Sê dankie vir mense wat leiers is in die gemeente of mense wat deurlopend diensbaar is – mense word só aan mekaar verbind en/of sien wat die ander ouderdomsgroepe mee besig is.
  • Hulp by die nagmaal – laat tieners en volwassenes saam help met nagmaal voorbereiding.
  • Gee vir gesinne diensbeurte saam bv. kollekte, nagmaal voorberei of uitdeel, verwelkoming by die deure ensovoorts.
  • Die lof en aanbiddings groep kan uit verskillende generasie musikante en sangers saamgestel word.
  • Gee vir 2 mense in verskillende ouderdomme saam ‘n taak of verantwoordelikheid byvoorbeeld om kategese te lei of ‘n uitreik te reël.
  • Laat jonk en oud saam bedien bv. by die teetuin of deur te verwelkom by die erediens.
  • Tieners kan saam met grootmense die speletjies aanbied by die basaar of saam potjiekos maak.

Lees gerus die hele artikel van John Roberto by http://www.intergenerationalfaith.com/uploads/5/1/6/4/5164069/becoming_intentionally_intergenerational_-_roberto.pdf

 

___________________________________________________________________________

 

 

Intergenerasionele Eredienste, Kategese en Kampe

Inleiding

Vra die vraag af: hoe lyk jou gemeente se eredienste, kategese en kampe op die oomblik?

Sal die volgende mense welkom voel in hierdie ruimtes:

  • ‘n Senior lidmaat?
  • ‘n Volwassene?
  • ‘n Tiener?
  • ‘n Laerskool kind?
  • ‘n Voorskoolse kind?

Teologiese Onderleg vir Intergenerasionele Jeugbediening

Voorheen het ons gemeentes gefunksioneer volgens die herder-kudde-model van kerk-wees wat baie klem plaas op die predikant en ander “lerende leiers” in die gemeente. Die res van die gemeente se funksie was baie meer passief en hulle het onderrig ontvang – veral kinders.

Ons is egter besig op ‘n reis in ons kerk waar die liggaamsmodel van kerk-wees baie meer klem geniet en dit dwing ons om anders te dink oor die funksie van AL ons lidmate binne die gemeente – ook kinders. Die liggaamsmodel lê klem daarop dat elke persoon ‘n belangrike rol het om te speel in die gemeente en dat kinders dus volwaardige ledemate is van die liggaam – daar is immers nie ‘n junior Heilige Gees nie!

Hoe lyk eredienste, kategese en kampe binne die bogenoemde twee modelle en hoe verskil dit?

Eredienste

‘n Erediens in ‘n gemeente waar die herder-kudde-model sterk funksioneer, sal baie klem lê op sekere rolspelers (en hulle sal meestal, indien nie almal nie, volwassenes wees) en daar sal min interaksie wees tussen die mense teenwoordig. Die diens sal grotendeels afhang van ‘n predikant wat doen en ‘n gemeente wat passief luister. Die opset is een-tot-baie, mense sit in rye agtermekaar en kinders is apart of afwesig.

‘n Erediens wat gebaseer is op die liggaamsmodel van kerk-wees, sal ruimte maak vir elke persoon in die vertrek om aktief daaraan deel te neem. Daar is gelyke waarde van almal teenwoordig. Mense leer bymekaar en kyk mekaar in die oë indien moontlik. Dit is nie net ‘n een-rigting-gesprek nie, maar ‘n gesprek tussen almal teenwoordig in een of ander vorm.

Voorbeelde:

  • Eredienswerkers (span wat mense verwelkom by die deur, nagmaaltekens uitdeel en offergawes opneem) bestaan uit gesinne – dus kinders en volwassenes van alle ouderdomme.
  • Daar is ‘n geleentheid in die diens vir kinders se verjaarsdae wat gevier word en selfs ‘n ouma sin wat gereeld die diens bywoon!
  • Daar is kinderliedjies sowel as meer volwasse-gerigte liedjies. Almal staan en sing beide genres liedjies saam, maar met die kinderliedjies staan die kinders soms op die stoele en doen die bewegings ook saam.
  • Kinders kan gebruik word om simbole in te bring of te gebruik wat aanhak by die preekreeks, bv. vlae met woorde op wat gedra word of kers wat tydens Lydenstyd uitgedoof word.
  • Geleentheid vir families of lidmate om na mekaar te draai en vrae te bespreek in die diens.
  • Daar kan selfs ‘n graad-diens gehou word vir ‘n spesifieke graad waar gesinne een van die kategese-lesse saam doen en die predikant van voor af fasiliteer.

Kategese en Kampe

Die herder-kudde-model van kerk-wees laat kategese ‘n skoolklaskamer dupliseer waar daar ‘n “onderwyser” is (gewoonlik ‘n volwassene) wat net kennis oordra aan passiewe kinders wat min geleentheid het om hulle eie opinies en vrae te gee en vra. Die klem is daarop dat hulle die kennis inneem en dit netso kan weergee.

Op kampe sal die prentjie baie eenders lyk, maar net met ‘n groter groep en in ‘n ander ruimte. Daar sal moontlik tye wees op die kamp vir ander aktiwiteite as kennisoordrag, maar dit sal losstaande wees en nie noodwendig ‘n spesifieke doel dien in terme van die vorming en inlewing van die tema nie.

Wanneer die beginsel van die liggaamsmodel op kategese toegpas word, het almal wat betrokke is ‘n rol om te speel. Die onderwysers word eerder fasiliteerders van ‘n gesprek waar die tema bespreek word en hierdie gesprek waar die kinders/tieners geleentheid kry om ook deel te neem is netso belangrik en onlosmaaklik verbind aan die kennis oordrag. Die groepe is kleiner sodat gesprek makliker kan plaasvind. Kategesegroepies sit in kringe sodat almal mekaar in die oë kan kyk en nie in ‘n ry voor die onderwyser nie. Ervaringsleer is ook belangrik.

Met kampe is een oorhoofse tema belangrik waarop alles gebasseer is: kennis, gesprekke, ervaringsleer en musiekbediening. Die doel van al hierdie aspekte van die kamp is geloofsvorming in ‘n eilandsituasie eerder as nét kennisoordrag. Kampeerders word ook in kleingroepe ingedeel met fasiliteerders en almal wat gaan kamp het ‘n rol, bv. kleingroepleiers, band, bidders, beraders, ens.

Ouervergaderings

Ouervergaderings in die herder-kudde-model lyk ook baie eenders as eredienste in hierdie model: die predikant van vooraf praat, ouers wat in rye sit en kinders wat afwesig is.

In die liggaamsmodel sal ‘n ouervergadering die kinders ook insluit, kinders sal saam met hulle ouers in kleingroepe sit en daar sal geleentheid wees vir hulle om ook met mekaar te kommunikeer oor dit wat van voor af met hulle gedeel word.

Wenke om ruimtes meer intergenerasioneel-vriendelik te maak

  • Handwerk (crafts) wat almal saam moet doen of elkeen individueel en dan met mekaar deel.
  • Oop vrae: Dit is belangrik dat die vra wawt gevra word deur ‘n 4-jarige sowel as ‘n 30-jarige beantwoord kan word.
  • Stories: Alle ouderdomme het stories om te vertel, maar ons het min tye om te luister na mekaar.
  • Getuienisse
  • Simboliek: Dit is iets waaraan ons almal kan deelneem.
  • Speletjies: Gesamentlike ervaringsleer of speletjies gebaseer op ‘n sekere tema of preek-/kategese-reeks wat huis toe geneem kan word om in huisgeloof tyd te speel.

Slot

Dink terug oor jou beskrywing van die ruimtes in julle gemeente aan die begin. Hoe kan jy net een ding in elke ruimte verander of toevoeg om dit meer intergenerasioneel te maak?

Moenie oorhaastig alles verander nie! Fasiliteer geloofsgroei met klein veranderinge.

Elzanne van der Westhuizen

Erediens en Musiek

Sommer ’n paar nota’s oor ‘Intergenerational ministry’ en
die rol wat dit in geloofsvorming speel – met spesifieke
fokus op die erediens en musiek

Meeste groter gemeentes het deesdae ’n verskeidenheid van eredienste.
Groepe word van mekaar geskei hetsy op grond van ouderdom of
spiritualiteitsvoorkeure.
Hoekom doen ons dit? Sommige meen dis a.g.v. die Verligting van die 18de
eeu toe meer klem begin lê is op die rede en onderrig. Aanbidding het toe
verander van ‘deelname aan geloof’ na ‘leer van geloof’.
Wanneer jy kinders vra waarom hulle kerk toe kom, wat is die standaard
antwoord? “Om meer van die Here te leer”. Ons het hulle dit mooi geleer,
nè.
Die verskil is tussen doksologie – om reg te aanbid – en dogmatiek – om reg
te glo. So, as ons glo dat aanbidding gaan oor reg glo – en kinders se
kognitiewe vermoëns is minder ontwikkeld as volwassenes s’n – dan maak dit
sin dat ons bedieningspraktyk sal wees om kinders eers te leer om reg te glo
– voordat hulle ons in aanbidding kan kom ‘join’.
Aanbidding gaan egter mos nie net oor reg glo nie…
’n Tweede moontlike rede – dalk ’n groter rede – is ons verbruikersmentaliteit.
Ons het ‘target marketing’ begin doen en ons glo dat deur ’n verskeidenheid
van bedieningsopsies te gee, bereik ons meer potensiële lidmate. Die vraag
is of ons nie juis in die proses meer en meer jong lidmate van ons vervreem
nie.
Die goeie nuus vir kleiner gemeentes is dat studies aantoon dat gemeentes
wat dit regkry om kinders en volwassenes saam in aanbidding te betrek,
klaarblyklik regtig groei.

Die res van die artikel kan jy hier aflaai: Aanbieding Intergenerationonal Erediens