kategete

“Alike” – pixar videogreep oor kreatiwiteit

“Alike” – pixar videogreep oor kreatiwiteit

Die pixar kortfilm “Alike” handel oor die samelewing wat kreatiwiteit, spontaniteit en die kunste onderdruk. Baie toepaslik om vir ‘n oueraand te gebruik om te gesels oor die uniekheid van kinders en die belang van spel en verbeelding. Die videogreep kan egter ook gebruik word om oor ander temas te gesels soos byvoorbeeld hoe ons mense se “godbelewenisse” in boksies plaas of hoe om God se stem opnuut te hoor. Of om te gesels oor wat ons eenders maak as gelowiges en wat ons anders maak. Of om oor diversiteit te gesels.

Kategete toerusting: verskillende “tipes” kinders

Junior of senior kategese leiers

Tema: Geroep om elke “tipe” kind / tiener te bedien

Tydsduur: 45min – 90min

Gebruik die artikel van Stephen Altrogge as vertrekpunt of die videogreep (skakels onderaan). Beide die artikel en die videogreep poog om verskillende “tipes” kinders te beskryf wat hul jeuggroep bywoon. Hierdie kan ‘n lekker pret aktiwiteit wees om te doen met ‘n kategete toerusting. Wees net versigtig dat kinders / tieners nie negatief geëtiketteer word nie, maar dat die fokus van die oefening is om die kinders / jongmense wat kategese bywoon beter te verstaan. Dit sal juis sinvol wees om na só ‘n oefening, weer ‘n rondte saam te dink oor hoe ‘n mens elkeen van hierdie “tipe” jongmense bedien.

Rig die toerusting as volg in:

Deel die artikel uit of som dit op (noem dalk net ‘n paar “tipes”, sodat die kategete self ook kan uitdink). Hou dit lig en humoristies. Gebruik die laaste paar vrae om meer ernstig saam te dink oor die hantering van verskillende persoonlikhede binne die kategese groep. Onthou om die kategete te herinner dat die oefening oor “tipes” juis ons wil herinner

Laat die kategete dan in groepe werk met die volgende vrae:

  • Beskryf die tipes kinders / tieners in ‘n tipiese kategese groep
  • Gee vir elke “tipe” ‘n naam. “Tipes” kan ook geteken word met kryte op blaaibordvelle!
  • Gee terugvoer aan die groter groep.

Dink nou weer saam in kleine groepe (jy kan as fasiliteerder ook telkens ‘n inset gee of terugvoer kry)

  • Wat is die beste manier om met elke “tipe” verhouding te bou?
  • Wat sou elke “tipe” se manier wees wat sy/haar geloof gevorm word?
  • Wat sou die uitdagings wees om met elke “tipe” te werk?
  • Wat sou die bydrae wees wat elke “tipe” lewer of kon lewer tot die groep?

 

Skep ‘n tyd vir selfondersoek

  • Hoe hanteer ek as kategeet verskillende kinders?
  • Het ek voorkeur “tipes”?
  • Is daar kinders wie se uniekheid en persoonlikheid ek beter moet leer waardeer en hanteer?

Lees Psalm 139: 1-18, 23-24

Sluit af met gebed

  • Vra God om jul liefde vir ELKE tipe kind / tiener te gee.
  • Dank Hom dat Hy elke mens uniek gemaak het.
  • Vra Hom om jou as kategeet te gebruik in elkeen se lewe.

 

Artikel om te gebruik:

The 14 Kids You Find In Every Church Youth Group

http://foreverymom.com/faith/the-14-kids-you-find-in-every-church-youth-group-stephen-altrogge/

Videogreep: https://www.youtube.com/watch?v=_fIoNYbHnAw

 

deur ds Anriëtte de Ridder

Kinders en die internet

10 wenke om hul veilig te hou!

deur Anriëtte de Ridder

  1. Lees meer oor internet veiligheid en die invloed van skermtyd sodat jy ‘n ingeligte ouer kan wees wat verantwoordelike besluite neem. www.commonsensemedia.org/cell-phone-parenting antwoord ‘n hele paar vrae hieroor en gee praktiese wenke.
  2. Stel ‘n wagwoord op jou rekenaar, foon en tablet sodat jy weet wanneer jou kind dit wil gebruik. Moenie dat jou kinders na willekeur op die internet kan gaan of videos kan kyk of toeps kan aflaai nie. Stel jou “parenting controls” op al die verskillende toestelle in die huis (rekenaars, tv, selfone ens). https://www.internetmatters.org/parental-controls/
  3. Wees altyd by as jou kind die internet gebruik. Gebruik ook ‘n veiliger soekenjin wat vir kinders ontwerp is soos byvoorbeeld Kiddle http://www.kiddle.co/ of Kids search http://www.kids-search.com/ of http://www.swiggle.org.uk/. Google het ook ‘n “safe search” funksie wat aangeskakel kan word en eksplisiete resultate uithou. So ook youtube  – lees meer daaroor hierhttp://parentalcontrols-on.org/YouTube. Daar is ook spesifieke apps wat help met navorsing vir take. Tieners moet verkieslik in oop, gemeenskaplike areas in die huis die internet gebruik.
  4. Sit jou foon of tablet op “flight mode” wanneer hul fotos wil kyk of speletjies wil speel sodat hulle nie per ongeluk internet toegang verkry nie.
  5. Stel “location settings” af. Stel jou “privacy settings” hoog by al jou sosiale media profiele.
  6. Maak seker jou foon  / tablet het ouderdomsbeperkinge en kontroles op! Dit verhoed sekere webtuistes om oop te maak sonder ‘n wagwoord of jou kind om nuwe apps af te laai, ens. Maak seker jy ken al die veiligheidstellings.  Lees meer hieroorhttps://www.commonsensemedia.org/cell-phone-parenting/how-do-i-set-parental-controls-on-the-iphone
  7. Gaan uit en sit af – Maak jou foon se apps toe wanneer jy dit nie gebruik nie. Gaan uit die internet wanneer jy nie jou rekenaar gebruik nie. Sit jou rekenaar/ foon af as jy dit nie gebruik nie.
  8. Wees self ‘n voorbeeld! Jou kind of tiener sal gou agterkom waarvoor jy die internet gebruik. Asook of jy afhanklik is van skermtyd.
  9. Gesels met jou kind oor die waarde asook die gevare van die internet, sodat hy/sy ook verantwoordelikheid kan neem by maats se huise.
  10. Stel saam as gesin reëls op oor internet gebruik (waarvoor, hoe, wanneer), skermtyd (wat, hoe lank), en sosiale media (hoe, wat, wanneer, met wie). Maak saam ‘n plakkaat en plak dit op waar almal dit kan sien.

Nog nuttige skakels:

https://www.internetmatters.org/advice/6-10/

https://www.commonsensemedia.org/cell-phone-parenting

https://www.commonsensemedia.org/videos/5-internet-safety-tips-for-kids

Kinderbedieningskonferensie Mei 2017 Hoëveld Sinode

Registrasie vanaf 8:00 te Northfield Metodiste kerk, Aerodrome rylaan, Northmead, Benoni.
8:30 Opening
9:00 Algemene sessie 1 Johan Smith Onderwerp: Dieper in Gesinne
9:45 Wegbreeksessie 1:
Sessie 1/1 Janco Mocke Lofprysing en aanbidding vir kinders
Sessie 1/2 Paul du Toit Hoe kinders die Bybel ontdek
Sessie 1/3 Jaco Schoeman Mylpaal bediening (Vibrant Faith)
Sessie 1/4 Verskeie sprekers Kinderkerk/Kategese materiaal
11:45 Algemene sessie 2 Wynand Coertzen Onderwerp: Wyer in skole
13:30 Wegbreeksessie 2
Sessie 2/1 Kenny Killian Hoe om ʼn Kinderkerk aan te bied.
Sessie 2/2 Hayley Walker Protective behaviours
Sessie 2/3 Transforming kids Hoe bereik ons skole?
Sessie 2/4 Hano Jacobs Bediening wyer deur Sosiale media
Sessie 2/5 Netta vd Walt Gebruik van praktiese hulpmiddels
15:00 Algemene sessie 3 Dirkie van der Spuy Onderwerp: Dieper en Wyer in leiers
16:15 Afsluiting

Boelies

…En sê nou daar’s ‘n boelie...-

‘n Rukkie gelede, oppad na KIX by een van ons skole, kom ek af op ‘n huilende kind, een van ons KIX-ers. Sy wou nie sê wat haar so ongelukkig maak nie. Toe ek haar ma die aand bel, kom die storie uit. Sy word geboelie, al lankal al, deur ‘n graad 3 dogtertjie en haar twee trawante wat ‘n terreurveldtog op die skoolterrein voer. In dieselfde week vertel iemand my van ‘n seuntjie van die ander skool. Soggens het hy maagpyn of gooi selfs op. Hy is te bang om skool toe te gaan, want hy word geboelie.

Baie mense voel dit is maar deel van grootword dinge. Maar só eenvoudig is dit nie. Boelies is ‘n universele verskynsel wat in elke land, kultuur, ouderdomsgroep en geslag plaasvind. Dit is ‘n probleem wat vir almal hoofbrekens besorg, ook vir kinderwerkers. Kom ons bekyk die verskynsel van boelies ‘n slag van naderby. Kom ons help en bemagtig mekaar om sodoende kinders, ouers en onderwysers te help wat hiermee te doen het.

Wat is ‘n boelie?

Dit is iemand wat beheer wil verkry oor ‘n meer weerlose of kwesbare persoon óf oor sy vriendekring[1] deur fisiese of verbale aggressie [2]. Seuns en dogters kan boelies wees.[3] Navorsing het bevind dat die verskynsel van boelies, baie dikwels in skole voorkom.[4]

Wat is tipiese boelie gedrag?[5]

  • Boelies is geneig om te boelie wanneer daar nie gesagsfigure naby is nie, byvoorbeeld op die speelgrond, in die kleedkamers of in die skool se gange.
  • Boelies het gewoonlik een of twee trawante wat altyd saam met hulle is en hul help om ‘n kind te intimideer.
  • ‘n Slagoffer kan geterg word, name genoem word, afgepers word of fisies seergemaak word.
  • Boelies kan stories of leuens oor die slagoffer versprei.
  • Boelies kan poog om almal teen die slagoffer te laat draai – om hom / haar ‘n uitgeworpene te maak.
  • Boelies kan die slagoffer se besittings wegsteek, beskadig of afvat.
  • Boelies kan slagoffers totaal ignoreer en ander sover kry om dieselfde te doen, die “silent treatment.”
  • Boelies kan die slagoffer dreig dat sy vriende of familie ook ge”kry” sal word.
  • Boelie gedrag doen nie net die slagoffer skade aan nie, maar ook aan die boelie self.[6]

Wat moet mens weet van boelies[7]

  • Hulle hou daarvan om mense te verkleineer, skaam of seer te maak.
  • Boelies het nie baie selfvertroue nie; daarom pik hulle op ander.
  • Hulle is dikwels ongelukkige mense met probleme.
  • Boelies voel beter oor hulleself as hulle ander kan laat sleg voel.
  • Baie kenners is dit eens dat boelies boelie, omdat hulleself geboelie is, miskien tuis, elders of by die skool. (NB Maar selfs al word iemand geboelie, het hy / sy ‘n keuse. Hy hoef nie ‘n boelie te word nie!)
  • Sommiges help die boelie om te boelie, om te verhoed dat hulleself geboelie word.
  • Boelies werk dikwels in groepe, want dit help hulle om verskonings te hê wanneer hulle uitgevang word, bv. “…Ek het dit nie begin nie… Ek was net daar naby… Hy [die slagoffer] het dit begin en ek het net my vriend gehelp…”
  • ONTHOU: ‘n Boelie kan alleenlik suksesvol wees indien niemand iets daaromtrent doen nie!
  • Boelies se ouers neig om inkonsekwent dissipline toe te pas en dikwels is daar min warmte of liefde in sulke gesinne.[8]
  • Gewoonlik is boelies nie model studente nie, presteer nie goed op skool nie en kom nie oor die weg met hul onderwysers nie.[9]
  • Boelies is nie gewild onder hul portuurgroep nie.[10]

Hoe lyk die boelie se tipiese slagoffer?[11]

  • ‘n Slagoffer kan enigiemand wees wat toevallig op die verkeerde tyd, op die verkeerde plek is.
  • Mense wat op enige wyse dalk “anders” is.
  • Enigiemand wat lyk asof hy / sy ‘n maklike teiken is (maklik om bang te maak).
  • Iemand wat kleiner of jonger as die boelie is.
  • Mense wat sensitief is, wat maklik huil of ontsteld word.
  • Mense wat nie baie vriende het nie, byvoorbeeld nuwe kinders.

Wat is die gevolge vir die slagoffer?[12]

  • Om geboelie te word is baie stresvol vir die slagoffer.
  • Kinders mag ‘n teësin ontwikkel vir skool.
  • Slagoffers begin alle lede van die portuurgroep wantrou en sukkel om vriende te maak.
  • Ekstreme slagoffers kan depressie of ‘n fisiese siekte ontwikkel.
  • Meeste slagoffers presteer goed op skool en is in staat om te begin vriende maak soos hulle ouer word.
  • Meeste slagoffers (veral die wat deur volwassenes ondersteun word) oorleef die boelie ondervinding sonder langtermyn newe-effekte.

Hoe hanteer mens ‘n boelie?[13]

  • Leer ‘n kind om ALTYD oplettend te wees en voortdurend op die uitkyk te wees vir ‘n moontlike boelie situasie.
  • Vermy ‘n boelie situasie. Weet wanneer om weg te loop.
  • Gebruik humor om ‘n boelie te ontlont. Maak ‘n grap wanneer ‘n boelie begin aanmerkings maak of begin om te terg. Daardeur kry die boelie nie die gewenste reaksie van die “slagoffer” nie. Laat die kind dit vooraf inoefen met rollespel. Gee vir die kind grappies / grappige sinsnedes wat hy / sy moontlik kan gebruik vir die boelie.
  • Tree self-handhawend (assertive) op. Sê DUIDELIK vir die boelie om te skoert of “GAAN WEG!” en stap dan self weg van die situasie. Laat die kind dit vooraf oefen in die spieël en deur rollespel.
  • Maak ‘n nuwe vriend(e).
  • Bly voortdurend tussen ‘n groep kinders. Boelies pik op kinders wat alleen is.
  • Soek vriendelike kinders se geselskap op en begin bou aan vriendskap met hulle.
  • Kry hulp by ‘n volwassene. Moedig die kind aan om as hy geboelie word, te gaan praat met ‘n onderwyser, sy ouers of ander volwassenes.[14]
  • Beskerm die kind se gevoelens teen “name-calling” deur hulle te leer om hulself te beskerm teen beledigings. Leer die kind dat om die boelie terug te beledig, die situasie net sal vererger.
  • Om die krag en seermaak uit woorde weg te neem, kan die beledigende woorde hardop gesê word deur die kind. Laat die kind dan die woorde “weggooi”. ‘n Mens kan die kind laat oefen om die woorde in ‘n vullisblik te gooi. Laat die kind daarna iets positiefs oor homself sê wat hy weer kan inneem. Byvoorbeeld: “Niemand hou van jou nie.” Ek gooi die woorde weg en sê “Ek hou van my.”
  • Leer die kind om nie dadelik tou op te gooi as ander kinders hom nie by ‘n speletjie insluit nie. Help die kind om vol te hou om te vra om saam te speel. (Laat die kind vooraf oefen om nie aggressief of kermend te klink as hy met hulle praat nie. Help hom om te oefen om positief en vriendelik te lyk. Oefen gesigsuitdrukkings in die spieël.)[15]
  • As ‘n laaste uitweg, (volgens sommige kenners) leer die kind selfverdediging, vir geval hy fisies seergemaak gaan word en hy nie van die situasie kan ontsnap of hulp kan kry nie.

Wat kan skole doen om boelies stop te sit?[16]

  • Moenie boelie gedrag ignoreer nie – spreek dit aan! ONTHOU: ‘n Boelie kan alleenlik suksesvol wees indien niemand iets daaromtrent doen nie!
  • Gaan doen deeglike “huiswerk”. Stel akkuraat vas wat die omvang van die probleem is.
  • Sorg dat volwassenes meer sigbaar is oral op die skoolterrein, maar veral die areas wat die boelie probleem voorkom, bv. kleedkamers, speelgrond, die nasorg lokale, gange, ens. Sorg vir beter toesighouding, veral tydens pouses.
  • Maak dit teen die reëls om iemand anders te boelie. Wees konsekwent om alle boelie gedrag te dissiplineer.
  • Praat ernstig met boelies. Laat hulle verstaan dat jy bewus is van wat hulle doen en dat jy dit nie gaan duld nie.
  • Help die boelies om hulp te kry. Boelies is mense wat self probleme het.

[1] Carol E. Watkins, M.D. (Northern County Psychiatric Associates, Lutherville and Monkton, Baltimore County, Maryland) – Dealing with Bullies and how not to be one (www.ncpamd.com)

[2] Laura DeHaan, Ph.D (Assistant Professor of Child Development, North Dakota State University) – Bullies, February 1997. (www.ag.ndsu.edu)

[3] Hara Estroff Marano – Big bad bully. Psychology Today Magazine, Sept / Oct 1995.

[4] Ibid.

[5] Bullying – being unkind to others (Kids’ Health: Children, Youth and Women’s Health Service, South Australia, 8 April 2008.)

[6] Carol E. Watkins, M.D. (Northern County Psychiatric Associates, Lutherville and Monkton, Baltimore County, Maryland) – Dealing with Bullies and how not to be one (www.ncpamd.com)

[7] Bullying – being unkind to others (Kids’ Health: Children, Youth and Women’s Health Service, South Australia, 8 April 2008.)

[8] Laura DeHaan, Ph.D (Assistant Professor of Child Development, North Dakota State University) – Bullies, February 1997. (www.ag.ndsu.edu)

[9] Ibid.

[10] Ibid.

[11] Bullying – being unkind to others (Kids’ Health: Children, Youth and Women’s Health Service, South Australia, 8 April 2008.)

[12] Laura DeHaan, Ph.D (Assistant Professor of Child Development, North Dakota State University) – Bullies, February 1997. (www.ag.ndsu.edu)

[13] Hara Estroff Marano – Big bad bully. Psychology Today Magazine, Sept / Oct 1995.

[14] Personal safety and self defense for children, teens and adults: Face bullying with confidence. KIDPOWER – webtuiste.

[15] Ibid.

[16] Laura DeHaan, Ph.D (Assistant Professor of Child Development, North Dakota State University) – Bullies, February 1997. (www.ag.ndsu.edu)

 

Toerusting vir Jeugleiers: #Imagine Ignite Jan 2017

15259603_694650427379903_8576923638044969516_o

#Imagine Ignite,  is toerustingsessies wat landswyd gehou word vir alle leiers in jeugbediening.
Anriëtte de Ridder skryf: “Dit behels verskillende sprekers en videogrepe oor allerlei onderwerpe, met groepbesprekings daarna.”
Die volgende geleentheid is op Saterdag, 28 Januarie 09:00 – 15:00 by Bergsig Gemeente in Durbanville.  Bring jou hele span jeug -vrywilligers (kategete, ouers, kinder- en jeugwerkers en predikante).  Die koste is R80 pp en dit sluit middagete en teetyd in.  Inskrywings teen Dinsdag, 24 Januarie by my in die Jeugkantoor per e-pos by jeug@sun.ac.za of 021 808 9050.
Jeugwerkers en jeugpredikante word ook genooi na ʼn spesiale #Imagine Ignite toerustingsessie net vir hulle op Vrydagoggend, 27 Januarie 2017 ook by Bergsig.  Dit is gratis, maar skryf ook asseblief daarvoor by my in.

 

Vriendelike groete

Gedagtes oor verhoudings, vryheid en lewe

#DIepdink

Cars- ja, die Disney fliek, met Lightning McQueen, Mater en Doc Hudson. Ten spyte daarvan dat albei my kinders dogtertjies is, speel Cars byna op “repeat” in die DVD masjien. Afgesien daarvan dat ek die storie letterlik honderde al gekyk het, het ek onlangs eers besef dat dit ’n storie oor vryheid is.

Aan die begin sien ons hoe McQueen se kuipe-span bedank, want McQueen is skynbaar ’n one-man-show. Hy wil nie gebind wees aan ander wat vir hom sê wanneer hy bande, of brandstof nodig het nie. Verhoudings is vir hom ’n struikelblok wat hom gevange hou en keer om sy doelwit te bereik, naamlik om wenner van die Piston Cup te wees. Dit is sy droom, maar meer, hy koppel sy hele identiteit aan die gedagte dat hy ’n renmotor is, wat moet kompeteer en wen.

Op pad na die wedren, wat die finale wenner sal bepaal, beland hy deur ’n snaakse sameloop van omstandighede as “gevangene” van Radiator Springs. Hy is gevonnis tot gemeenskapsdiens, om die hoofstraat te herstel. In die loop van die paar dae daar ontwikkel hy verhoudings met karre, waarmee hy nooit andersins sou nie. Hy leer dat sukses en prestasies as doelwitte leeg is.

Dit het vir my ’n treffende beeld geword van ons lewe saam met Jesus. Baie mense van ons wêreld is baie prestasie gedrewe en in die proses word verhoudings kettings wat ons gevange hou. Die cliché is egter dat wanneer die doelwitte behaal word, is dit leeg wanneer daar niemand is om die vreugde mee te deel nie.

Ek verstaan die storie van die Bybel dat Jesus nie teenprestasie is nie. Hy is nie teen die gedagte dat ons ontwikkel en uitnemend leef nie, maar Jesus is beslis eerste vir verhoudings. Ons is gemaak om God se liefde te ontvang en ander mense lief te hê. Wanneer ons uitnemendheid en sukses gekoppel word aan verhoudings, het dit ’n groei-effek op ander mense.

Aan die einde van Cars wen McQueen nie die Piston Cup nie. Hy kom derde en dus laaste, maar skielik is hy deel van verhoudings wat die eerste plek baie relatief maak. Hy ontdek dat die verhoudings baie meer vryheid gee as sukses en bekendheid.

Wanneer ons uitnemend lief het en verhoudings bou ontdek ons vryheid, want prestasies alleen is koue selle waarin ons opgesluit word. Saam met ander mense is daar vryheid en die lewe in oorvloed waarvan Jesus praat (Joh. 10).

*Hierdie het voorheen in NG Kenridge se Vrydag Nuus verskyn.

Om te luister

#DIepdink

Jy ken daai gevoel. Daai gevoel dat iemand nie mooi geluister het na wat jy sê nie. Wanneer dit met my gebeur is sommer dadelik kwaad, want die ander persoon gee dan nie regtig aandag aan my nie en dit laat my onbelangrik voel en ook dat my verhouding met die persoon nie belangrik is nie. Die meeste van ons doen dit, sonder dat ons dit besef. Steven Covey beweer dat ons in ons luister-proses baie kere meer besig is om ons eie reaksie te formuleer as om regtig te luister na wat iemand sê.

Wanneer ons met iemand stry kom dit nog beter na vore en baie kere ontaard die stryery in ’n “shouting match” want ons voel dat wanneer ons die volume hoër maak, ons die punt beter sal kan dryf en op daardie manier gehoor sal word.

Om regtig na mense te luister is een van die maklikste maniere om menswaardigheid aan mense te betoon. Maar, om regtig te luister vat tyd en dit kos energie, want ons moet in iemand anders se skoene inklim. Die storie van Jesus en die pa wie se kind demoon-besete was (Markus 9:14-29) wys vir ons dat Jesus gehoor het wat aan die gebeur was, maar dat hy ook geluister het. Die manier waarop Jesus geluister het, het waarskynlik netsoveel beteken as die feit dat Jesus die seun gesond gemaak het.

Pete Scazzero[1] help ons met ’n paar praktiese punte om na mense te luister (en daarvan raak sigbaar in Jesus se optrede):

  1. Plaas jou eie agenda op die agtergrond. Jou eie agenda maak dat jy net wil hoor wat jy wil hoor, mis wat jy nie wil hoor nie en daarom nie luister nie.
  2. Laat die persoon praat tot hulle die hele gedagte afgehandel het. Wanneer ons “inchip” maak dit die omgewing vir hulle onveilig en in plaas van deel, word hulle dan verdedigend.
  3. Probeer dit wat die persoon gesê het in jou eie woorde herhaal en laat die persoon toe om jou te korrigeer, indien nodig. Dit sê vir die persoon, jy het geluister en dat jy moeite doen om te verstaan wat hy/sy probeer sê.
  4. As dit lyk of die persoon klaar gepraat het, maak eers seker of hy/sy klaar is. Dit maak dit moontlik vir die persoon om alles af te pak, sodat hulle kan voel hulle is gehoor.

Mag ons werklik na mense luister. Mag ons op hierdie eenvoudige manier mense help om menswaardig te voel. Mag mense op hierdie manier Jesus se genade deur ons beleef.

*Hierdie het voorheen in NG Kenridge se Vrydag Nuus verskyn.

[1] Peter Scazzero, 2006, Emotionally Healthy Spirituality, Zondervan

Soos jy bid, so glo jy, so leef jy.

#DIepdink

’n Paar jaar gelede het ’n skoolvriendin se man het binne ’n kwessie van enkele dae van blakend gesond beweeg, na onophoudelike hoofpyn, na ’n diagnose van ’n gewas op sy brein, na intensiewe sorg in die hospitaal, na dood. Deur die tyd het ek, saam met ’n klomp ander vriende en familie met groot hoop en verwagting gebid dat God die jong man sal genees, sodat hy kon voortgaan om vir sy pragtige jong gesin te sorg.

Hoe swakker dit gegaan het, hoe meer het ek gebid, tot my gebede meer die kleur van kerm en neul aangeneem het. Na sy dood was ek vies vir God en gefrustreerd met die Bybel en woedend vir Christene. Ek was vies omdat God nie ek en my vriendin se gebede verhoor het, soos ons wou nie. Ek was gefrustreerd met die Bybel, want dit belowe die opstandingskrag van Jesus, dat ons kan vra wat ons wil in sy Naam en hy sal gee en selfs dat ons nog groter werke sou doen as Jesus, maar helaas – geeneen van daardie beloftes het hier gegeld nie. Ek was woedend vir Christene wat vooraf groot stellings soos “Spreek net lewe” gemaak het en na sy dood self doodstil was.

Ek is steeds bietjie vies vir God, want my vriendin is nou ’n weduwee met twee seuns, waarvan een nooit sy eie pa sal ken nie. Ek weet nie hoe lyk God se pad nou met haar nie, maar hy het weer vir my een ding oor my lewe saam met Hom in gebed, geloof en lewe kom wys.

In Lukas 11:1-11 vra die dissipels vir Jesus om hulle te leer bid, waarna hy vir hulle die Onse Vader leer, die gewilde soek, klop en vra uitspraak maak. Heel aan die einde sê hy egter die volgende:

“As julle wat sleg is, dan weet om goeie geskenke aan julle kinders te gee, hoeveel te meer sal die Hemelse Vader die Heilige Gees gee vir hulle wat Hom vra.”

Ek het geleer dat ons enige iets in gebed vir God kan vra. Ek het uit Lukas 11 geleer dat in gebed, ons God se volle, onverdeelde aandag kry, deur sy Gees. Ek het geleer, dat God nie altyd vir ons gee wat ons wil hê nie, maar Hy gee homself. Ek het dus geleer dat om aanhoudend te bid, aanhoudend my geloof versterk deur die Heilige Gees se teenwoordigheid te verseker en dat ek uit sy teenwoordigheid kan leef met die troos dat niks, nie eers die dood, my van Hom kan skei nie.

*Hierdie het voorheen in NG Kenridge se Vrydag Nuus verskyn.

Gerat om jong mense te begelei: Issues

groeipyne-1

OPENING (5 minute):

Gebed  en verwelkoming

Inligting

Die manier hoe Jesus sy dissipels gelei het was om hulle te leer en te lei om ’n nuwe lewenstyl te kweek. Geloof is nie net ’n kopoefening nie, dit is ’n nuwe leefstyl.

Vandag se tieners sit met ’n groot verskeideneid issues wat hulle lewenstyl verstrengel. Daarom moet hierdie issues ook aangespreek word.

Issue:  “an important topic or problem for debate of discussion: personal problems or difficulties.”

Hierdie afdeling wil u as kategeet toerus met inligting sodat u voorbereid sal wees op wat van die hedendaagse issues kan wees in n tiender se lewe en hoe om ’n issue te hanteer.

ONTKNOPING (5 minute):

Laat almal in groepe verdeel (5-10 in ‘n groep) en die volgende vraag bespreek:

Is daar iemand wat al gekonfronteer was met ’n situasie waarin ’n tiener issue gehad het wat hulle onkant gevang het?

Kry terugvoer in die groep en in die grootgroep.

LERING (30 minute):

Video

Kyk die vierde videosnit oor issues.

Hier is ‘n opsomming van die video:

  • Die lewe is soos ‘n legkaart waar elke deel inmekaar en aanmekaar gevelg is, die een staan nie los van die ander nie.
  • As daar ‘n onewewig aan die een onstaan, raak dit al die res en dit is waarom issues mense so kan verlam en maak dat jy voel of jy nie met die lewe kan aangaan tot daardie issue uitgeklaar is nie.
  • Jy as kategeet het ‘n bepaalde kurrikulum om deur te gaan in ‘n jaar met ‘n aantal lesse en sessie wat jy wil afhandel. Dis moontlik om dit als reg te kry en heeltemal die kinders/tieners in jou groep se lewens te mis.
  • Daarom kan jy nie met jou materiaal werk, los van julle issues nie.
  • Daar is hierdie ewige spanning van wat is die tieners se lewens en krisisse en hoe kan ek hierdie inhoud daaraan koppel.
  • Jou rol as kategeet is nie net om deur die materiaal te werk nie, maar om ‘n mentor vir die tiener(s) deur hulle issues te wees soos wat Paulus vir Timoteus was.

Gesprekspunte:

Laat almal in groepe oor die volgende praat en kry terugvoer in die grootgroep.

  1. Watter probleme of issues het die jongmense van vandag?
  2. Hoe sou jy wou hê kan die kerk se mense jou help met jou issues?
  3. Hoe belangrik is vertroulikheid?
  4. Oor watter tipe probleme kan ek nie stilbly nie? Hoe hanteer ek dit?
  5. Hoe het iemand jou al gehelp met jou issues? Vertel jou storie.

AFSLUITING (2 minute):

Gebed

Ons Dierbare Vader,

Daar is ’n groep jongmense wat elke Sondag voor ons sit. Elkeen met hulle eie issues. Here mag hulle weet dat hulle hierdie issues wat hulle lewenswyse verstrengel, nie alleen hoef te hanteer. Mag U die vertrouensband tussen ons en hierdie jongmense seën. Gee hulle die vrymoedigheid om hierdie issues met iemand te kom deel.

Dan wil ons vra Here, seën ons met die krag om elke kind en haar issue met die nodige wysheid en diskresie te hanteer. Sodat ons hulle kan help of kan lei na iemand wat wel kan help. Dankie Here dat ons kan weet U het hierdie kinders vir ons gestuur om meer te werk en dat ons kan vertrou dat die Gees saam met ons in hierdie kinders se geloofsopvoeding werk.

Amen

EKSTRA INLIGTING:

Audio clips

Temas wat op die CD verskyn is:

  1. Aanspreeklikheid
  2. Afstand
  3. Ander se probleme
  4. Jou storie is te hard
  5. Moenie bang wees vir hulp nie
  6. Moenie oordeel nie
  7. Moenie probleme soek nie

Geneem uit: Gerat om jongmense te begelei – Toerusting vir kategete en jeugleiers (Jeugfokus 2012)

 

Bestel die volledige reeks by Bybelmedia 0860 26 33 42, bestel@bmedia.co.za of http://eshop.bybelmedia.org.za/product/gerat-om-jongmense-te-begelei/