leier toerusting

Hoe vorder die gesprek oor Jong Volwassenes in jou gemeente?

Gebruik hierdie vrae in die ring of kerkraad om te luister en te evalueer hoe die gesprek oor Jong Volwassenes (s.g. millennials) vorder….

  • Vertel wat jy/julle gedoen het om te ontdek wat jongmense nodig het?
  • Of vertel van ‘n keer toe jy/julle jongmense betrek het?

Dalk het jy:

  • Doelbewus met ‘n millennial gesels?
  • Die plakker uitdaging gedoen? (deel ‘n wacky Wednesday burger special, koop data, speel ‘n bordspeletjie, stap in die natuur, maak saam kos)*
  • Die poskaarte gebruik met die verhale van millennials agterop?*
  • ‘n gesprek gereël in jou ring of dorp oor of met jong volwassenes
  • ‘n Vergadering beplan met millennials op die agenda
  • ‘n Jong predikant, Jeugwerker of theologies student genooi of leer ken
  • ‘n Kursus bygewoon, ‘n artikel of boek gelees of ‘n youtube video gekyk oor die millennial generasie of die toekoms van die kerk
  • ‘n Jonger persoon betrek by ‘n diensgroep, kommissie, bediening of projek
  • ‘n Jong volwassenes betrek by die kerkraad of ander leiersgroep

Vrae en voorbeelde stamgestel deur die Jong Volwasse Leer Gemeenskap 2018.

*Die “Gotta Love Millennials” plakker uitdaging en die poskaarte kan in elektronies formaat gratis aangevra word by jeug@sun.ac.za.

Huisgeloof en die senior lidmaat

Hoekom senior lidmate betrek by huisgeloof?

Huisgeloof is nie net ‘n kinder- of gesinsbediening program nie, maar ʼn manier om kerk te doen.  Ons eerste gedagte aan huisgeloof is hoe ons ouers kan help om geloofsvorming by die huis te kan doen, maar geloofsvorming is ʼn lewenslange proses wat alle ouderdomme insluit.

(more…)

Die waardevolste geskenk aan jou kind!

– Immanuel van Tonder

Daar is een geskenk wat meer waardevol is as die meeste ander geskenke wat jy aan jou kind kan gee.  Hierdie geskenk kos niks nie, maar dit vra alles van jou.  Dit is binne bereik van elke ouer maar dit is ook een van die moeilikste geskenke om te gee.  Dié geskenk is om elke oomblik met deernis (compassion) volbewus teenwoordig te wees.    ‘n Ander woord daarvoor is “mindfulness” of “kindfulness”. Ek gebruik die woord deernisvolle volbewussyn.

(more…)

Wat is my spiritualiteit tipe?

Is jy blou, rooi, groen of geel? Watter van die volgende beskryf jou die beste?

Blou:
•Ek maak seker dat ek die Waarheid oor God weet.
•Ek hou daarvan om nog meer feite te ontdek van my geloof, wat my oortuigings onderstreep en duidelik maak.
•Ek doen moeite om die regte antwoord te kry op ander se vrae.
•Die Bybel is ‘n bron van kennis.

(more…)

Hoe kan ‘n gemeente ‘n familie raak (deel 1)

Gespreksnotas (deel 1) van die Familie Netwerk byeenkoms gehou op 19 Julie 2018 aan die hand van ‘n hoofstuk “Congregations as Family” in die boek “Passing on the Faith. A Radical New Model For Youth and Family Ministry” deur Merton P. Strommen en Richard A. Hardel.

 Is familiebediening ‘n afdeling van gemeente-wees of is ‘n gemeente een groot familie?

Familiebediening is beide‘n afdeling van gemeente-wees én die gemeente is ook een groot familie. Daarom beteken familiebediening dat ons twee dinge doen:

(more…)

Millennials – energie en kreatiwiteit

Millennials is ‘n onuitputlike bron van energie en kreatiwiteit. Jy sal verras wees oor die palet van kleur wat hulle jou aanbied. Gryp die geleentheid aan!

Communitas se Predikantebegeleiding bied ‘n dagkonferensie/gesprek aan saam met prof Jaco Hamman van die VANDERBILT Teologiese Skool in Nashville, VSA. Hy is professor in Teologie, Sielkunde en Kultuur.

Sy boek, “The Millennial Narrative” handel oor die vraag: hoe kan die kerk mense bereik wat as ‘spiritual but not religious’ identifiseer?

6 VBO punte is te verdien, ‘n lekker middagete is deel daarvan, jy is saam met vriende en kollegas en bo alles word jy deur die dag begelei deur ‘n belese, berese, goed-ingeligte en dinamiese gespreksleier. Kom verruim jou en julle gemeente se bediening.

Die kursus op Maandag, 6 Augustus sal vanaf 9h30 – 15h30 plaasvind in die Hofmeyrsaal by die Fakulteit Teologie in Stellenbosch.

Kontak Adrienne Bester vir inskrywings by bestera@sun.ac.za /021 808 3382

“Alike” – pixar videogreep oor kreatiwiteit

“Alike” – pixar videogreep oor kreatiwiteit

Die pixar kortfilm “Alike” handel oor die samelewing wat kreatiwiteit, spontaniteit en die kunste onderdruk. Baie toepaslik om vir ‘n oueraand te gebruik om te gesels oor die uniekheid van kinders en die belang van spel en verbeelding. Die videogreep kan egter ook gebruik word om oor ander temas te gesels soos byvoorbeeld hoe ons mense se “godbelewenisse” in boksies plaas of hoe om God se stem opnuut te hoor. Of om te gesels oor wat ons eenders maak as gelowiges en wat ons anders maak. Of om oor diversiteit te gesels.

Kategete toerusting: verskillende “tipes” kinders

Junior of senior kategese leiers

Tema: Geroep om elke “tipe” kind / tiener te bedien

Tydsduur: 45min – 90min

Gebruik die artikel van Stephen Altrogge as vertrekpunt of die videogreep (skakels onderaan). Beide die artikel en die videogreep poog om verskillende “tipes” kinders te beskryf wat hul jeuggroep bywoon. Hierdie kan ‘n lekker pret aktiwiteit wees om te doen met ‘n kategete toerusting. Wees net versigtig dat kinders / tieners nie negatief geëtiketteer word nie, maar dat die fokus van die oefening is om die kinders / jongmense wat kategese bywoon beter te verstaan. Dit sal juis sinvol wees om na só ‘n oefening, weer ‘n rondte saam te dink oor hoe ‘n mens elkeen van hierdie “tipe” jongmense bedien.

Rig die toerusting as volg in:

Deel die artikel uit of som dit op (noem dalk net ‘n paar “tipes”, sodat die kategete self ook kan uitdink). Hou dit lig en humoristies. Gebruik die laaste paar vrae om meer ernstig saam te dink oor die hantering van verskillende persoonlikhede binne die kategese groep. Onthou om die kategete te herinner dat die oefening oor “tipes” juis ons wil herinner

Laat die kategete dan in groepe werk met die volgende vrae:

  • Beskryf die tipes kinders / tieners in ‘n tipiese kategese groep
  • Gee vir elke “tipe” ‘n naam. “Tipes” kan ook geteken word met kryte op blaaibordvelle!
  • Gee terugvoer aan die groter groep.

Dink nou weer saam in kleine groepe (jy kan as fasiliteerder ook telkens ‘n inset gee of terugvoer kry)

  • Wat is die beste manier om met elke “tipe” verhouding te bou?
  • Wat sou elke “tipe” se manier wees wat sy/haar geloof gevorm word?
  • Wat sou die uitdagings wees om met elke “tipe” te werk?
  • Wat sou die bydrae wees wat elke “tipe” lewer of kon lewer tot die groep?

 

Skep ‘n tyd vir selfondersoek

  • Hoe hanteer ek as kategeet verskillende kinders?
  • Het ek voorkeur “tipes”?
  • Is daar kinders wie se uniekheid en persoonlikheid ek beter moet leer waardeer en hanteer?

Lees Psalm 139: 1-18, 23-24

Sluit af met gebed

  • Vra God om jul liefde vir ELKE tipe kind / tiener te gee.
  • Dank Hom dat Hy elke mens uniek gemaak het.
  • Vra Hom om jou as kategeet te gebruik in elkeen se lewe.

 

Artikel om te gebruik:

The 14 Kids You Find In Every Church Youth Group

http://foreverymom.com/faith/the-14-kids-you-find-in-every-church-youth-group-stephen-altrogge/

Videogreep: https://www.youtube.com/watch?v=_fIoNYbHnAw

 

deur ds Anriëtte de Ridder

Kinderbedieningskonferensie Mei 2017 Hoëveld Sinode

Registrasie vanaf 8:00 te Northfield Metodiste kerk, Aerodrome rylaan, Northmead, Benoni.
8:30 Opening
9:00 Algemene sessie 1 Johan Smith Onderwerp: Dieper in Gesinne
9:45 Wegbreeksessie 1:
Sessie 1/1 Janco Mocke Lofprysing en aanbidding vir kinders
Sessie 1/2 Paul du Toit Hoe kinders die Bybel ontdek
Sessie 1/3 Jaco Schoeman Mylpaal bediening (Vibrant Faith)
Sessie 1/4 Verskeie sprekers Kinderkerk/Kategese materiaal
11:45 Algemene sessie 2 Wynand Coertzen Onderwerp: Wyer in skole
13:30 Wegbreeksessie 2
Sessie 2/1 Kenny Killian Hoe om ʼn Kinderkerk aan te bied.
Sessie 2/2 Hayley Walker Protective behaviours
Sessie 2/3 Transforming kids Hoe bereik ons skole?
Sessie 2/4 Hano Jacobs Bediening wyer deur Sosiale media
Sessie 2/5 Netta vd Walt Gebruik van praktiese hulpmiddels
15:00 Algemene sessie 3 Dirkie van der Spuy Onderwerp: Dieper en Wyer in leiers
16:15 Afsluiting

Boelies

…En sê nou daar’s ‘n boelie...-

‘n Rukkie gelede, oppad na KIX by een van ons skole, kom ek af op ‘n huilende kind, een van ons KIX-ers. Sy wou nie sê wat haar so ongelukkig maak nie. Toe ek haar ma die aand bel, kom die storie uit. Sy word geboelie, al lankal al, deur ‘n graad 3 dogtertjie en haar twee trawante wat ‘n terreurveldtog op die skoolterrein voer. In dieselfde week vertel iemand my van ‘n seuntjie van die ander skool. Soggens het hy maagpyn of gooi selfs op. Hy is te bang om skool toe te gaan, want hy word geboelie.

Baie mense voel dit is maar deel van grootword dinge. Maar só eenvoudig is dit nie. Boelies is ‘n universele verskynsel wat in elke land, kultuur, ouderdomsgroep en geslag plaasvind. Dit is ‘n probleem wat vir almal hoofbrekens besorg, ook vir kinderwerkers. Kom ons bekyk die verskynsel van boelies ‘n slag van naderby. Kom ons help en bemagtig mekaar om sodoende kinders, ouers en onderwysers te help wat hiermee te doen het.

Wat is ‘n boelie?

Dit is iemand wat beheer wil verkry oor ‘n meer weerlose of kwesbare persoon óf oor sy vriendekring[1] deur fisiese of verbale aggressie [2]. Seuns en dogters kan boelies wees.[3] Navorsing het bevind dat die verskynsel van boelies, baie dikwels in skole voorkom.[4]

Wat is tipiese boelie gedrag?[5]

  • Boelies is geneig om te boelie wanneer daar nie gesagsfigure naby is nie, byvoorbeeld op die speelgrond, in die kleedkamers of in die skool se gange.
  • Boelies het gewoonlik een of twee trawante wat altyd saam met hulle is en hul help om ‘n kind te intimideer.
  • ‘n Slagoffer kan geterg word, name genoem word, afgepers word of fisies seergemaak word.
  • Boelies kan stories of leuens oor die slagoffer versprei.
  • Boelies kan poog om almal teen die slagoffer te laat draai – om hom / haar ‘n uitgeworpene te maak.
  • Boelies kan die slagoffer se besittings wegsteek, beskadig of afvat.
  • Boelies kan slagoffers totaal ignoreer en ander sover kry om dieselfde te doen, die “silent treatment.”
  • Boelies kan die slagoffer dreig dat sy vriende of familie ook ge”kry” sal word.
  • Boelie gedrag doen nie net die slagoffer skade aan nie, maar ook aan die boelie self.[6]

Wat moet mens weet van boelies[7]

  • Hulle hou daarvan om mense te verkleineer, skaam of seer te maak.
  • Boelies het nie baie selfvertroue nie; daarom pik hulle op ander.
  • Hulle is dikwels ongelukkige mense met probleme.
  • Boelies voel beter oor hulleself as hulle ander kan laat sleg voel.
  • Baie kenners is dit eens dat boelies boelie, omdat hulleself geboelie is, miskien tuis, elders of by die skool. (NB Maar selfs al word iemand geboelie, het hy / sy ‘n keuse. Hy hoef nie ‘n boelie te word nie!)
  • Sommiges help die boelie om te boelie, om te verhoed dat hulleself geboelie word.
  • Boelies werk dikwels in groepe, want dit help hulle om verskonings te hê wanneer hulle uitgevang word, bv. “…Ek het dit nie begin nie… Ek was net daar naby… Hy [die slagoffer] het dit begin en ek het net my vriend gehelp…”
  • ONTHOU: ‘n Boelie kan alleenlik suksesvol wees indien niemand iets daaromtrent doen nie!
  • Boelies se ouers neig om inkonsekwent dissipline toe te pas en dikwels is daar min warmte of liefde in sulke gesinne.[8]
  • Gewoonlik is boelies nie model studente nie, presteer nie goed op skool nie en kom nie oor die weg met hul onderwysers nie.[9]
  • Boelies is nie gewild onder hul portuurgroep nie.[10]

Hoe lyk die boelie se tipiese slagoffer?[11]

  • ‘n Slagoffer kan enigiemand wees wat toevallig op die verkeerde tyd, op die verkeerde plek is.
  • Mense wat op enige wyse dalk “anders” is.
  • Enigiemand wat lyk asof hy / sy ‘n maklike teiken is (maklik om bang te maak).
  • Iemand wat kleiner of jonger as die boelie is.
  • Mense wat sensitief is, wat maklik huil of ontsteld word.
  • Mense wat nie baie vriende het nie, byvoorbeeld nuwe kinders.

Wat is die gevolge vir die slagoffer?[12]

  • Om geboelie te word is baie stresvol vir die slagoffer.
  • Kinders mag ‘n teësin ontwikkel vir skool.
  • Slagoffers begin alle lede van die portuurgroep wantrou en sukkel om vriende te maak.
  • Ekstreme slagoffers kan depressie of ‘n fisiese siekte ontwikkel.
  • Meeste slagoffers presteer goed op skool en is in staat om te begin vriende maak soos hulle ouer word.
  • Meeste slagoffers (veral die wat deur volwassenes ondersteun word) oorleef die boelie ondervinding sonder langtermyn newe-effekte.

Hoe hanteer mens ‘n boelie?[13]

  • Leer ‘n kind om ALTYD oplettend te wees en voortdurend op die uitkyk te wees vir ‘n moontlike boelie situasie.
  • Vermy ‘n boelie situasie. Weet wanneer om weg te loop.
  • Gebruik humor om ‘n boelie te ontlont. Maak ‘n grap wanneer ‘n boelie begin aanmerkings maak of begin om te terg. Daardeur kry die boelie nie die gewenste reaksie van die “slagoffer” nie. Laat die kind dit vooraf inoefen met rollespel. Gee vir die kind grappies / grappige sinsnedes wat hy / sy moontlik kan gebruik vir die boelie.
  • Tree self-handhawend (assertive) op. Sê DUIDELIK vir die boelie om te skoert of “GAAN WEG!” en stap dan self weg van die situasie. Laat die kind dit vooraf oefen in die spieël en deur rollespel.
  • Maak ‘n nuwe vriend(e).
  • Bly voortdurend tussen ‘n groep kinders. Boelies pik op kinders wat alleen is.
  • Soek vriendelike kinders se geselskap op en begin bou aan vriendskap met hulle.
  • Kry hulp by ‘n volwassene. Moedig die kind aan om as hy geboelie word, te gaan praat met ‘n onderwyser, sy ouers of ander volwassenes.[14]
  • Beskerm die kind se gevoelens teen “name-calling” deur hulle te leer om hulself te beskerm teen beledigings. Leer die kind dat om die boelie terug te beledig, die situasie net sal vererger.
  • Om die krag en seermaak uit woorde weg te neem, kan die beledigende woorde hardop gesê word deur die kind. Laat die kind dan die woorde “weggooi”. ‘n Mens kan die kind laat oefen om die woorde in ‘n vullisblik te gooi. Laat die kind daarna iets positiefs oor homself sê wat hy weer kan inneem. Byvoorbeeld: “Niemand hou van jou nie.” Ek gooi die woorde weg en sê “Ek hou van my.”
  • Leer die kind om nie dadelik tou op te gooi as ander kinders hom nie by ‘n speletjie insluit nie. Help die kind om vol te hou om te vra om saam te speel. (Laat die kind vooraf oefen om nie aggressief of kermend te klink as hy met hulle praat nie. Help hom om te oefen om positief en vriendelik te lyk. Oefen gesigsuitdrukkings in die spieël.)[15]
  • As ‘n laaste uitweg, (volgens sommige kenners) leer die kind selfverdediging, vir geval hy fisies seergemaak gaan word en hy nie van die situasie kan ontsnap of hulp kan kry nie.

Wat kan skole doen om boelies stop te sit?[16]

  • Moenie boelie gedrag ignoreer nie – spreek dit aan! ONTHOU: ‘n Boelie kan alleenlik suksesvol wees indien niemand iets daaromtrent doen nie!
  • Gaan doen deeglike “huiswerk”. Stel akkuraat vas wat die omvang van die probleem is.
  • Sorg dat volwassenes meer sigbaar is oral op die skoolterrein, maar veral die areas wat die boelie probleem voorkom, bv. kleedkamers, speelgrond, die nasorg lokale, gange, ens. Sorg vir beter toesighouding, veral tydens pouses.
  • Maak dit teen die reëls om iemand anders te boelie. Wees konsekwent om alle boelie gedrag te dissiplineer.
  • Praat ernstig met boelies. Laat hulle verstaan dat jy bewus is van wat hulle doen en dat jy dit nie gaan duld nie.
  • Help die boelies om hulp te kry. Boelies is mense wat self probleme het.

[1] Carol E. Watkins, M.D. (Northern County Psychiatric Associates, Lutherville and Monkton, Baltimore County, Maryland) – Dealing with Bullies and how not to be one (www.ncpamd.com)

[2] Laura DeHaan, Ph.D (Assistant Professor of Child Development, North Dakota State University) – Bullies, February 1997. (www.ag.ndsu.edu)

[3] Hara Estroff Marano – Big bad bully. Psychology Today Magazine, Sept / Oct 1995.

[4] Ibid.

[5] Bullying – being unkind to others (Kids’ Health: Children, Youth and Women’s Health Service, South Australia, 8 April 2008.)

[6] Carol E. Watkins, M.D. (Northern County Psychiatric Associates, Lutherville and Monkton, Baltimore County, Maryland) – Dealing with Bullies and how not to be one (www.ncpamd.com)

[7] Bullying – being unkind to others (Kids’ Health: Children, Youth and Women’s Health Service, South Australia, 8 April 2008.)

[8] Laura DeHaan, Ph.D (Assistant Professor of Child Development, North Dakota State University) – Bullies, February 1997. (www.ag.ndsu.edu)

[9] Ibid.

[10] Ibid.

[11] Bullying – being unkind to others (Kids’ Health: Children, Youth and Women’s Health Service, South Australia, 8 April 2008.)

[12] Laura DeHaan, Ph.D (Assistant Professor of Child Development, North Dakota State University) – Bullies, February 1997. (www.ag.ndsu.edu)

[13] Hara Estroff Marano – Big bad bully. Psychology Today Magazine, Sept / Oct 1995.

[14] Personal safety and self defense for children, teens and adults: Face bullying with confidence. KIDPOWER – webtuiste.

[15] Ibid.

[16] Laura DeHaan, Ph.D (Assistant Professor of Child Development, North Dakota State University) – Bullies, February 1997. (www.ag.ndsu.edu)

 

Gerat om jong mense te begelei: Issues

groeipyne-1

OPENING (5 minute):

Gebed  en verwelkoming

Inligting

Die manier hoe Jesus sy dissipels gelei het was om hulle te leer en te lei om ’n nuwe lewenstyl te kweek. Geloof is nie net ’n kopoefening nie, dit is ’n nuwe leefstyl.

Vandag se tieners sit met ’n groot verskeideneid issues wat hulle lewenstyl verstrengel. Daarom moet hierdie issues ook aangespreek word.

Issue:  “an important topic or problem for debate of discussion: personal problems or difficulties.”

Hierdie afdeling wil u as kategeet toerus met inligting sodat u voorbereid sal wees op wat van die hedendaagse issues kan wees in n tiender se lewe en hoe om ’n issue te hanteer.

ONTKNOPING (5 minute):

Laat almal in groepe verdeel (5-10 in ‘n groep) en die volgende vraag bespreek:

Is daar iemand wat al gekonfronteer was met ’n situasie waarin ’n tiener issue gehad het wat hulle onkant gevang het?

Kry terugvoer in die groep en in die grootgroep.

LERING (30 minute):

Video

Kyk die vierde videosnit oor issues.

Hier is ‘n opsomming van die video:

  • Die lewe is soos ‘n legkaart waar elke deel inmekaar en aanmekaar gevelg is, die een staan nie los van die ander nie.
  • As daar ‘n onewewig aan die een onstaan, raak dit al die res en dit is waarom issues mense so kan verlam en maak dat jy voel of jy nie met die lewe kan aangaan tot daardie issue uitgeklaar is nie.
  • Jy as kategeet het ‘n bepaalde kurrikulum om deur te gaan in ‘n jaar met ‘n aantal lesse en sessie wat jy wil afhandel. Dis moontlik om dit als reg te kry en heeltemal die kinders/tieners in jou groep se lewens te mis.
  • Daarom kan jy nie met jou materiaal werk, los van julle issues nie.
  • Daar is hierdie ewige spanning van wat is die tieners se lewens en krisisse en hoe kan ek hierdie inhoud daaraan koppel.
  • Jou rol as kategeet is nie net om deur die materiaal te werk nie, maar om ‘n mentor vir die tiener(s) deur hulle issues te wees soos wat Paulus vir Timoteus was.

Gesprekspunte:

Laat almal in groepe oor die volgende praat en kry terugvoer in die grootgroep.

  1. Watter probleme of issues het die jongmense van vandag?
  2. Hoe sou jy wou hê kan die kerk se mense jou help met jou issues?
  3. Hoe belangrik is vertroulikheid?
  4. Oor watter tipe probleme kan ek nie stilbly nie? Hoe hanteer ek dit?
  5. Hoe het iemand jou al gehelp met jou issues? Vertel jou storie.

AFSLUITING (2 minute):

Gebed

Ons Dierbare Vader,

Daar is ’n groep jongmense wat elke Sondag voor ons sit. Elkeen met hulle eie issues. Here mag hulle weet dat hulle hierdie issues wat hulle lewenswyse verstrengel, nie alleen hoef te hanteer. Mag U die vertrouensband tussen ons en hierdie jongmense seën. Gee hulle die vrymoedigheid om hierdie issues met iemand te kom deel.

Dan wil ons vra Here, seën ons met die krag om elke kind en haar issue met die nodige wysheid en diskresie te hanteer. Sodat ons hulle kan help of kan lei na iemand wat wel kan help. Dankie Here dat ons kan weet U het hierdie kinders vir ons gestuur om meer te werk en dat ons kan vertrou dat die Gees saam met ons in hierdie kinders se geloofsopvoeding werk.

Amen

EKSTRA INLIGTING:

Audio clips

Temas wat op die CD verskyn is:

  1. Aanspreeklikheid
  2. Afstand
  3. Ander se probleme
  4. Jou storie is te hard
  5. Moenie bang wees vir hulp nie
  6. Moenie oordeel nie
  7. Moenie probleme soek nie

Geneem uit: Gerat om jongmense te begelei – Toerusting vir kategete en jeugleiers (Jeugfokus 2012)

 

Bestel die volledige reeks by Bybelmedia 0860 26 33 42, bestel@bmedia.co.za of http://eshop.bybelmedia.org.za/product/gerat-om-jongmense-te-begelei/

Gerat om jongmense te begelei: Groeipyne

groeipyne

OPENING (5 minute):

Gebed  en verwelkoming.

Inligting

Die jeug is NOU al reeds deel van die kerk. Hulle is juis ‘n belangrike deel van die kerk, want hulle het die potensiaal om die kerk vorentoe te neem waar die vorige geslagte dit nooit kon neem nie.

As ‘n kategeet is jy in die bevoorregte posisie om n groot verskil in die jongmense in jou klas se geloofslewe te maak, maar om dit effektief te kan doen, moet ons verstaan met wie ons werk, want nie almal wat “jeug” is, is op dieselfde vlak nie.

Hierdie handleiding wil u as n kategeet help om te verstaan dat daar verskillende fases in die kind se lewe is, wat beteken daar is ook verskillende vlakke in hulle geloofslewe.

Daar is ook inligting om lesse en byeenkomste beter te benader, sodat dit werklik tot die kind deurdring.

ONTKNOPING (5 minute):

  • Laat almal in groepe verdeel (5-10 in ‘n groep) en die volgende vraag bespreek:
  • Verstaan jy werklik die kinders wat in jou klas is?
  • Kry terugvoer in die groep en in die grootgroep.

LERING (30 minute):

Video

Kyk die derde videoskyf oor Groeipyne.

Gesprekspunte na die video:

Laat almal in groepe oor die volgende praat en kry terugvoer in die grootgroep. Groepe kan ingedeel word volgens die ouderdomme van die kinders vir wie als gegee word. Groepe kan die verskillende fases dan bespreek.

  1. Hoe verskil ‘n graad 1 tot 3 kind van ‘n grad 4 tot 6 kind?
  2. Wat wil ‘n laerskool in die klas doen en wat wil hulle nie doen nie?
  3. Kan ‘n graad 2 seun abstrakte konsepte bespreek?
  4. Wat verander om en by die ouderdom van 13?
  5. Hoe ver is ‘n tiener se kognitiewe ontwikkeling?
  6. Is dit normaal vir ‘n tiener om te rebelleer en vrae te vra? Doen alle tieners dit?

AFLSUITING (2 minute):

Gebed

Here God Almagtig, U het ons as kategeet geroep om ’n rol te kom speel in jongmense se lewens. Here elke kind wat voor ons sit word gekonfronteer met verskillende goed in die lewe, en daarom Here wil ons vra dat U ons as kategeet sal toerus met die nodige wysheid, kalmte en geduld wanneer die jongmense begin vrae vra. Mag ons ’n oor he om te luister en as ons oor die kennis beskik, mag ons hulle so goed as moontlik antwoord. Here mag hulle U ook al hoe beter leer ken deur al hulle vrae.

Amen

EKSTRA INLIGTING:

Audio clips

Temas wat op die CD verskyn is:

  1. Balaans
  2. Jongmense se vriende
  3. Nie almal ontwikkel ewe vinnig nie
  4. Soektog na identiteit
  5. Stereotipering
  6. Uniek tog eenders
  7. Verhouding met ouers

ONTWIKKELINGSFASES

Hierdie is ‘n baie basiese kykie na die ontwikkelingsfases van kinders / jongmense in die kerk. Soveel meer kan nog gesê word op elkeen van die ontwikkelings-fases. Mag dit jou prikkel om verder te lees en te ontdek. Paulus het gesê: “Vir almal het ek alles geword om in elk geval sommige te red. – 1 Kor 9:22”[1]. Na die mate wat ons verstaan wie die jongmens is wat voor ons sit, sal ons in staat wees om ons metodes aan te pas en die inhoud van die geloof tuis te bring.

Baba’s ouderdom 0-2 jaar

  • ‘n Baba is uitgelewer aan sy emosies – basiese sekuriteit is belangrik.
  • Die wete dat sy primêre versorger sal kom wanneer hy huil / roep sal later die mees basiese boustene van geloof word.
  • In die kerk moet ma of pa die ene wees wat hom haar vashou en versorg.
  • Dis wonderlik as ‘n kerk ‘n ruimte kan skep waar doeke omgeruil kan word, en ouers iets van die diens kan beleef terwyl hulle hul ouerlike take verrig.

Kleuters ouderdom 2-6 jaar

  • Beweging en aksie is belangrik in hierdie fase: dis die tyd van groot – motoriese ontwikkeling: hulle wil swaai, skopfiets ry, op die gras speel.
  • Hulle kan al ‘n eenvoudige Bybelles inneem, maar kan slegs in kort grepe konsentreer: rofweg 1 minuut vir elke jaar oud. Voorwerpe en sigbare lesse maak die inneem-proses soveel makliker.
  • Die hele kind se ontwikkeling is belangrik: intellektueel, sosiaal, emosioneel, geestelike, fisies. Om te leer ‘n beker vashou, is so belangrik soos ‘n loflied.
  • Klein groepies werk beter op hierdie ouderdom vir beter sorg.
  • Meestal kan hulle nie op hierdie ouderdom met maatjies speel nie, maar langs maatjies speel. Kerk is ‘n goeie plek waar hy kan leer om te sosialiseer.
  • Kleuters is basies selfsugtig, kan nog nie weg van homself dink nie. Sy onmiddellike behoeftes moet nou bevredig word.

Kinders ouderdom 6-9 jaar

  • Op hierdie ouderdom is stories baie belangrik: die stories gee die rou data vir ons verstaan van God – Wie is God? Hoe magtig is God? Waarvan hou God? Wat maak Hom kwaad? Hoe moet God se mense optree?
  • Hulle is baie lyflik: as kind se voete nie grond raak nie kan hy nie stil sit nie. Die help as ‘n kerk ‘n speelplek het waar hierdie behoefte uitgeleef kan word.
  • Hulle kan slegs konkrete begrippe verstaan: om te glo is ‘n reeks aksies word ons uitvoer: ons gehoorsaam ons ouers, ons lees en bid elke aand, ens.
  • Vermy simboliese taal, bv. om Jesus in jou hart in te nooi.
  • Hierdie is die “age of believe” – hulle wil glo. Om te glo in wonderwerke, en die bo-natuurlike mag van God kom maklik.
  • Beelde en simbole kan deur middel van stories oorgedra word, soos die storie van jou doop, en die storie van nagmaal.

Die oorgangsjare van ouderdom 10-14 jaar

  • Hierdie is ‘n belangrike oorgangsfase, nl. puberteit, en vir party kom dit vroeër as ander.
  • Dit verander hul totale menswees:

=  intellektuele ontwikkeling – Hulle begin kritiese denke ontwikkel: hoekom sê my pa een ding, maar doen ‘n ander ding? Hulle Bybelvers-memorisering is optimaal in hierdie fase. Hulle vra vrae oor die oorsprong van God, die dinosourusse in Genesis, en “ as God so magtig is, hoekom ….” Hulle leef in ‘n tydperk van tegnologiese ontwikkeling waar hulle alle inligting kan bekom met ‘n paar knoppies – die kerk kan dit positief aanwend.

= fisiese ontwikkeling: Seuns se stemme raak dieper, baard begin groei, en meisies ontdek hul skoonheid. Party is onbeholpe en val oor hul eie voete. Hul seksualiteit ontwikkel en saam met dit kom vrae, ontdekking  en eksperimentalisme.

= Sosiale ontwikkeling: Hul maats raak baie belangrik: ander se opinie, om aanvaar te word, deel van ‘n vriendekring te wes, is alles van kardinale belang. Hulle toets verskeie identiteite: Wil ek ‘n jock wees, of ‘n geek, of ‘n rocker, of emo? Ouers word effe op die agtergrond geskuif, maar het nog steeds ‘n kragtige inspraak op hul ontwikkeling. Hulle begin “ander” mense in hul wêreld raaksien: armes en minderbevoorregtes. Dis ‘n goue tyd vir die kerk om hulle te leer hoe om diensbaar te wees.

= Emosionele ontwikkeling: Hulle is buierig. Hulle beleef sterk emosies en is soms uitgelewer hieraan. Help hulle om hulself uit te druk en die gevoelens in woorde oor te plaas. Dis belangrik dat die mense van die kerk onvoorwaardelike liefde toon: al kom hulle met watter emosies by die klas aan.

= Geestelike ontwikkeling: Hulle is in staat om die hele verlossingsleer te verstaan, te ken en te kommunikeer aan ander. Hulle is fyngevoelig vir skyn-heiligheid. Die stories en voorbeelde van ander geestelike volwassenes by die kerk, kan dien as belangrike rolmodelle. Hulle moet betrokke gemaak word by diens-aksies.

Jong volwassenes van ouderdom 15-18 jaar

  • Die media en ons Westerse kultuur wil hierdie ouderdom jongmens in die kategorie van “adolessent” indeel: nog vis, nog vlees: nie kind nie, nie volwasse nie en geen verantwoordelikheid nie. Neurologiese navorsing bewys egter dat hulle breins werk soos enige volwassene s’n – maar soos volwassenes sonder lewenservaring. So, hanteer hulle so: op gelyke voet en met dieselfde waarde as ander volwassenes, maar met die behoefte van goeie rolmodelle en mentors wat hulle gidse kan wees.
  • intellektueel: Hulle het ‘n behoefte om die data van geloof te integreer in hul daaglikse lewens, en sal dikwels gesprekke voer oor die waarde van gebed, die sinloosheid van die lewe, tradisie-vastheid van die kerk en verskillende vorme van geestelikheid. Hulle daag bestaande strukture uit en dink nuut oor baie dinge. Hulle kan sterk oortuiginge ontwikkel wat selfs tot ‘n duidelike lewens-roeping kan lei. Hier moet hulle finale eienaarskap vir hul geestelike lewe neem, en dit moet in die finalejaar-katkisasie ‘n fokus wees.
  • fisies: Daar vind baie brein-ontwikkeling plaas in hierdie tyd, en daarom is hulle konstant moeg. Vroeë oggend-aktiwiteite werk nie vir hulle nie. Hul behoefte aan fisiese kontak met hul ouers neem af.
  • sosiaal: vriendskap en romanse blom al hoe meer. Hulle vind hul waarde in die interaksie met ander van hul ouderdom. Hulle eksperimenteer met risiko-gedrag om te sien of daar iets in is vir hulle of nie. Juis daarom is dit so belangrik dat hulle ‘n goeie waarde-sisteem reeds in plek moet hê wat hulle beskerm teen die gevare hiervan.
  • Emosioneel: Hulle is op ‘n paadjie na onafhanklikheid. Na die mate wat hulle hul emosies kan verwoord, kan hulle dit verwerk. Hulle begin vooruit kyk na die lewe en leefstyl wat vir hulle voorlê as volwassenes.

 

 

Geneem uit: Gerat om jongmense te begelei – Toerusting vir kategete en jeugleiers (Jeugfokus 2012)

 

Bestel die volledige reeks by Bybelmedia: 0860 26 33 42, bestel@bmedia.co.za of groeipynehttp://eshop.bybelmedia.org.za/product/gerat-om-jongmense-te-begelei/

[1] Die Bybel Nuwe Vertaling. 1998 (electronic ed.) (1 Co 9:22). Cape Town, South Africa: Bybelgenootskap van Suid-Afrika.

5 VBO Kursusse vir 2017

www-gazillionthanks-comKursusse Jeug- en familiebediening


Padlangs ouerskap

Jan van Zyl en Johann Winterbach

14-16 Februarie 2017

Die doel van die kursus is om ouers te begelei in deelnemende positiewe ouerskap.

Ouers word toegerus met gereedskap om hulle te help om ʼn veilige ruimte te skep waar elkeen in die gesin die geleentheid kry om sy/haar volle potensiaal te ontwikkel.

Kinders word ook geleer om self verantwoordelikheid vir hulle gedrag te neem. In die proses waar kinders geleer word om keuses te maak, leer hulle selfstandigheid. Die einddoel is ʼn plek waar almal in die gesin gelukkig en tevrede is.

Deelnemers ontvang die volgende vaardighede en gereedskap:

  • om die belangrikheid van kwaliteit-tyd te besef;
  • hoe om empaties te wees – verskeie kommunikasie-vaardighede word aangeleer soos om te eggo, refleksiewe luister, edm;
  • positiewe geloofwaardige terugvoer;
  • nie-bedreigende kommunikasie;
  • ek-boodskappe;
  • dissipline en
  • hoe om ʼn huisvergadering in te rig.

Hierdie kursus word spesifiek so ingerig dat deelnemers toegerus word om die kursus self te gaan aanbied.


VARS! Alternatiewe bedieningsmodelle aan naskoolse jongmense en millennium ouers

Anriëtte de Ridder en Gielie Loubser

3-4 Mei 2017

Benut die geleentheid om vars perspektiewe te kry en ‘n relevante bedieningsmodel te ondersoek vir jou konteks.

  • Wie is “Millennials” en hoe dink en leef hulle?
  • Wat wys die nuutste navorsing vir ons oor hierdie groep se unieke geloofsgewoontes en behoeftes?
  • Hoe kan gemeentes nuwe bedieningsgeleenthede raaksien en ontgin?
  • Wat leer voorbeelde en stories hiervan vir ons oor nuwe moontlikhede en vars metodes?
  • Hoe word ons eie perspektiewe oor kerkwees in die proses uitgedaag en vernuwe?

Millennials vra verseker ’n nuwe manier van kerkwees.  Wat hierdie nuwe vorme kan kerk alles kan wees word hoofsaaklik bepaal deur die konteks. Tog is dit nodig om ’n verbeelding te ontwikkel van wat alles moontlik is.

Kom dink en praat saam oor die uitdaging wat millennials vir ons stel om relevant te bedien.


Speltegnieke in jeugbediening

Siegfried Louw

27-28 Junie 2017

Hierdie is ʼn kursus vir eenvoudige spelterapie-tegnieke met skoolgaande kinders (tieners ingesluit)

  • Gemeentes wil betrokke raak by die broses in die samelewing, maar sukkel soms met die wêreld van ʼn kind. Kinders geniet nie “praat-terapie” nie, want hulle abstrakte denke is nog nie daar nie (die jongeres).
  • Speltegnieke gee aan ons die instrument om kinders se lewensvordering te fasiliteer, indien ʼn paar basiese beginsels gevolg word.
  • Gestalt speltegnieke word gebruik om kinders te bemagtig met selfstandigheid, verantwoordelikheid en volledige menswaardigheid. Die kind bly in beheer van sy/haar eie proses.

Na die kursus

  • Sal jy weet hoe om basiese speltegnieke in berading te benut.
  • Sal jy praktiese speltegnieke vir emosionele ontlonting kan gebruik. ʼn Verskeidenheid van mediums word gedek.
  • Die basiese teoretiese vertrekpunte van Gestalt speltegnieke sal deel van jou kennisvaardighede wees.
  • Ons verwagting is dat jy van die kursus sal wegstap met ʼn gevoel dat jy iets konkreet kan gaan doen in jou omgewing.

SAAM! Intergenerasionele jeugbediening

Anriëtte de Ridder e.a.

6-7 September 2017

Benut die krag van saamwees en ondersoek moontlikhede om binne in jou gemeente ruimte te skep vir intergenerasionele bediening.

  • Wat is intergenerasionele bediening?
  • Wat wys die nuutste navorsing vir ons oor geloofsvorming wat ʼn impak het oor hoe ons dink oor jeugwerk?
  • Wat is die basiese uitgangspunte en kern sleutels van ʼn intergenerasionele strategie?
  • Hoe verander die beginsels van intergenerasionele jeugbediening tradisionele ruimtes soos die erediens, kategese, feeste, die bediening van sakramente, ens.?
  • Watter praktiese voorstelle en kontekstuele voorbeelde is daar?

Daar is ruimtes in ons gemeentes wat aan volwassenes behoort (“adult centred spaces”) en dan is daar ruimtes waar daar op kinders gefokus word (“child centred spaces”). In eersgenoemde word die styl, taal en gewoontes deur die volwasse lidmate bepaal en is hulle behoeftes die fokuspunt (dink maar aan ʼn erediens). In laasgenoemde werk dit net mooi anders om en is kinders se geloofsontwikkeling en lewensfases weer die uitgangspunt en volwassenes is daarop gefokus (dink maar aan kategese).

ʼn Intergenerasionele bediening skep ruimtes waar generasies SAAM bedien kan word, almal verwelkom word, almal die ruimte beïnvloed en almal mekaar kan beïnvloed. Hierdie kursus ondersoek die teorie en praktyk van intergenerasionele jeugbediening en hoe dit prakties in verskillende fasette van gemeentebediening (erediens, kategese, kampe, uitreike, feeste, ens) asook huisgeloof geïntegreer kan word.


Kategese vir die volgende generasie

Anriëtte de Ridder e.a.

24-26 Oktober 2017

Die geloofsvorming raamwerk, die nuutste navorsing en kontekstuele nadenke bied ʼn padkaart om kategese te herontwerp vir die volgende generasie!

  • Teologiese grondbeginsels en Bybelse perspektief vir geloofsvorming
  • Die uitdagings vir kategese en geloofsvorming vandag
  • Leidrade wat die nuutste navorsing vir ons gee
  • Kategese as deel van ʼn groter jeugbediening-strategie
  • Kontekstuele toepassing
  • Nadenke oor belydenisaflegging
  • Die proses van dissipelskap en mentorskap
  • Kategese materiaal keuse
  • Ouers se betrokkenheid en rol
  • Huisgeloof en familiebediening

Tydens die kursus sal daar gekyk word na die teologiese raamwerk vir geloofsvorming en hoe kategese steeds ʼn belangrike deel daarvan vorm.  Ons gaan ook saam dink oor hoe kategese in ʼn nuwe konteks en generasie ʼn nuwe vorm aanneem. Die nuutste navorsing gee vir ons perspektief oor hoe ons vars uitdrukking aan antieke beginsels kan gee. Verskillende kontekstuele benaderings (byvoorbeeld stad, platteland, klein, medium en makro gemeentes) sal ook aandag geniet. Die Kategese taakspan van die Algemene Sinode se boekie “Geloofsvorming herontwerp” beskryf 12 bakens vir geloofsvorming wat as subtemas vir die gesprekke sal dien. Daar sal ook deurgaans saam gesoek word na “best practices” wat jou gemeente kan help om effektiewe geloofsvorming te fasiliteer.

LW Hierdie is ‘n herhaling van die kategese kursus wat in Oktober 2016 aangebied is.

Skole: Hoe vat ons hande en met wie?

www-gazillionthanks-com-1Nicola Alberts skryf oor die gesprek oor skole bediening:

Godsdiens word nie tans uit die skool uit gedryf nie, maar daar moet opgelet word dat die wet gelyke regte eis vir alle gelowe en dat godsdiensbeoefening nie die minimum skooldag se ure of inhoud beïnvloed nie.

Die veranderende wêreld van die leerder het `n invloed op ons bediening van hulle, byvoorbeeld sosiale media, ‘n kultuur van alles bevraagteken, kritiese denkers, diversiteit, ekonomiese omstandighede (baie kinders kan nie kampe bywoon nie) en die verkrummeling van familiestrukture.

Die groot vraag is hoe vat ons hande en met wie?

Die kerk en skool moet in dieselfde rigting probeer beweeg. ‘n Waardesisteem vir skole kan hiermee help. met ‘n program wat hierby aansluit. Alle gelowe kan hierby baat vind. Sekere skole doen dit reeds en kies per kwartaal ‘n kleur wat die waarde simboliseer of ‘n dier met sekere eienskappe.

As daar net een kerk in `n skool verteenwoordig word, veroorsaak dit wrywing, veral as daardie kerk sy dogma op kinders van ander kerke probeer afdwing. Dit is dus ook belangrik dat verskillende kerke saamwerk (mbv ‘n beleidsdokument).

Stories uit gemeentes:

In ‘n gesprek oor skole bediening gehou deur die Taakspan vir Jeug en Familiebediening van die Wes Kaap Sinode (4 Augustus 2016) het jeugwerkers en –leraars stories gedeel van hoe hulle skole in hulle konteks benader….

Stellenberg Gemeente het genoem dat samewerking tussen denominasies tans ‘n uitdaging is. Veral omdat ‘n sekere denominasies sterk voorskrifte het wat hulle in die skool propageer. Die skool se christen vereniging is egter interkerklik en vermy om te praat oor sekere onderwerpe nie (soos doop) t.w.v. die verhoudings. Daar is onderwysers wat vir hierdie vereniging verantwoordelik is en die gemeentes moet betrek. ‘n Beleidsdokument sal baie help in hierdie konteks.

Wellington Moeder gemeente het ‘n jeugleraar aangestel wat ook  `n kantoor by die skool het en 2 dae van `n week voldag by die skool is vir pastorale gesprekke met kinders. Hy bly ook by die koshuis. Graad 11’s en 12’s is kringleiers vir kleingroepe en daar is ‘n toerusting sessie vir hulle een keer per week. Toewyding van leerders is egter soms uitdagend. Daar is ook ‘n weeklikse VCSV byeenkoms na skool saans. Die beleid van die skool is dat geen ander skool aktiwiteite in daardie tyd gereël mag word, maar in werklikheid hou al die onderwysers nie daarby nie. Die selgroep en praise & worship in die koshuis elke tweede week werk goed, solank ‘n mens net deurgaans bewus bly van die ritmes van die skool.

Stellenbosch Moedergemeente het ‘n jeugwerker aangestel wat ook verantwoordelik is vir skole bediening. Hy probeer om die verhoudings tussen die denominasies te verbeter wat voorheen ‘n groot uitdaging was. Dit is baie belangrik om ook goeie verhoudings met die onderwyser/s te hê. Ondersteun ander gemeentes se jeugaande en drink koffie met die ander jeugleiers op die dorp.

In Riviersonderend gemeente verteenwoordig die skole op die dorp glad nie die gemeente se kinders nie. Die meeste kinders in die gemeente is in privaatskole of in koshuise in Caledon. Onderwysers met `n passie vir kerkwees is baie belangrik en daarom is een manier waarop ‘n gemeente skole kan bedien om onderwysers wat lidmate is te ondersteun.  Daar is “koshuisgodsdiens” in die plaaslike koshuis vir ‘n halfuur elke week. Die uitdaging is dat die kinders in die koshuise tussen graad 1 en 6 is. Skole bediening op ‘n klein plattelandse dorp is baie missionaal, omdat daar so min kinders van jou eie gemeente. Dit is belangrik om ook die leiers van die skool (leerlingraad en ander) te ontwikkel en op só ‘n manier die skool te bedien.

Ander gemeentes vertel van hoe hul jeugwerkers betrokke is by byvoorbeeld sportafrigting. Ander ondersteun weer die skole se CSV of die onderwyser wat daarvoor verantwoordelik is. Waar daar ‘n jeugwerker in ‘n skool geplaas kan word is daar baie groter kans vir verhoudingsbou en pastoraat. Bedienings moet egter meestal interkerklik gebeur. Een gemeente het ook ‘n projek waar hul kinders help met huiswerk en ‘n ander vertel weer van ‘n waarde-gedrewe kampe wat hul aanbied vir die skool.

Skole bediening gaan minder oor ‘n spesifieke gemeente en baie meer oor samewerking ter wille van die koninkryk! 

Nicola Alberts is verantwoordelik vir jeugwerk by die Hottentots-Holland Familiekerk in Somerset Wes. Sy het hierdie artikel geskryf na aanleiding van ‘n gesprek oor skole bediening gehou op 4 Augustus 2016 in Stellenbosch. Die gesprek is gereël deur die Taakspan vir Familie en Jeug bediening van die Wes Kaap Sinode.

 

 

Teologiese Opleiding Is ek geroep? Of dalk my kind of kleinkind?

 

Bemoedig of ontmoedig ek geroepenes?

Wat doen jy as jy sê jy is geroep? Of dalk jou kind of kleinkind?

Wanneer ‘n persoon ervaar dat God hulle roep, is hulle meestal baie onseker. Onseker of hulle goed genoeg is om God se werk te doen. Baie geroepenes loop vir lank met hierdie bewuswording van ‘n roeping sonder om met iemand daaroor te gesels.

Ek wil jou aanmoedig om hieroor te gesels …
Luister gerus na Frederick Marais in die onderstaande kort video.
Inskrywings sluit einde September. Kontak Amanda van Niekerk by 021 808 9138 of toerusting@sun.ac.za met navrae.

https://www.youtube.com/watch?v=fbsAXmQ70Us

#Imagine Ignite 2016 leierstoerusting

imagine-ignite

Graag nooi ons jou en jou leiers, om die Imagine Ignite konferensie by te woon, wat dwars oor die land in 15 verskillende plekke, aangebied gaan word.

Ons reël hierdie byeenkoms vir alle leiers wat met kinders of tieners werk.  Dit sluit predikante, jeugwerkers, vrywilligers asook ouers in, wat met kinders of tieners werk.

Die doel van hierdie konferensie is, om mense toe te rus in die jeugbediening en dus is dit ʼn ideale geleentheid vir jou om kategete en leiers in jou bediening te nooi na hierdie geleentheid.

Hier is die “link” na die “Facebook page” indien jy wil sien, watter konferensie die naaste aan jou is:

https://www.facebook.com/ImagineIgniteSA/events

Indien jy sou belangstel om Imagine Ignite by jou kerk of dorp te “Host”, kontak asseblief vir Rehet by: info@imaginemovement.co.za

Alle video materiaal word voorsien asook ʼn volledige pakket met wat jy gaan benodig.

Ons sien uit daarna om soveel moontlik mense by die verskillende geleenthede te hê, sodat ons kan saam dink, droom en leer oor jeugbediening.

Ons vra ook dat jy die inligting asseblief op sosiale media, kerk Nuusbriewe en whatsapp groepe sal deel.

Vriendelike groete

Anriette