ouerleiding

Geloofsontwikkeling: Junior- en Middelfase

Hoe kan jy meer sinvol betrokke wees by die geloofsgroei van kinders in die junior- en middelfase? Hierdie 9 groeikante kan jou help!

Die Junior- en Middelfase begin sigbaar word tussen die ouderdom van 5 en 7 en duur gewoonlik tot in die vroeë adolessensiejare van 11 tot 13.

Saamgestel deur Bybel-Media.

Kry dit hier: Groeikante-Junior-en-Middelfase

Adventreeks vir gesinne: name van Jesus

Hier is ‘n adventsreeks vir gesinne oor die name van Jesus volgens Jesaja 9:5. Daar is 5 kort Bybelstudies wat gesinne saam hierdie vakansie kan doen wat elk telkens ‘n teksgedeelte, aktiwiteit, gespreksvrae en gebedswenk bevat. Dit is saamgestel deur twee predikante uit buurgemeentes in Wellington, Lettie Büchner en Annelet Slazus. Die formaat is van só aard dat dit maklik deur gemeentes gedruk en as ‘n pakket uitgedeel kan word.

Die temas is as volg:
Advent (inleiding)
1. Name het betekenis (Jesaja 9:5)
2. Wonderbare Raadsman (Johannes 3:1-21)
3. Magtige God (Johannes 6:1-15)
4. Ewige Vader (Lukas 18:15-17)
5. Vredevors (Lukas 19:1-10)

Kersfees_Kosblik_2018

Opsioneel: voeg bordkryt en ‘n teeliggie by elke gesin se pakket as hulpmiddels.

Doopjoernaal – leef jou doopbelofte

Jy wil graag jou kind se doopdag spesiaal maak, ʼn dag om te vier, ʼn dag om onthou te word. Die Doopjoernaal sal jou help om aan hierdie viering diepte te gee en jou kind te leer om sy of haar doopdag ook self te vier.

Die Doopjoernaal bied riglyne vir gesprekke, aktiwiteite en geloofsgewoontes wat ouers sal help om hulle kinders te laat ontdek dat hulle bly wees oor hulle band met Christus, om hulle kinders opgewonde te maak oor die pad waarop God hulle voete geplaas het, om hulle te laat besef dat die Gees altyd by hulle is, om ander gelowiges as hulle familie te sien – en om te weet dat hulle die wêreld ingestuur word om vanuit God se liefde vir God en ander mense te gaan leef. ʼn Boek om jou en jou kind te help om die rykdom van die doop te vier en nooit te vergeet nie.

  • Dit word gebruik saam met die boek Watermerk, wat vorm gee aan gesprekke oor die doop tussen die ouers en leraars.

R70 by Bybelmedia te koop. http://eshop.bybelmedia.org.za/product/doopjoernaal/

Hoe kan jy jou groep inrig vir alle spiritualiteite?

Mense verskil in die manier waarop hulle vir God ervaar en aanbid. Een manier om dit te verduidelik is aan die hand van die 4 spiritualiteit tipes. Vir elkeen van die 4 tipes is daar ‘n simbool en kleur toegeken, naamlik:  

  1. kop (hulle ervaar God deur hulle intelek, rede en geloofoortuigings) (blou);
  2. hart (hulle ervaar God deur hulle emoties, warmte en persoonlike verhoudings) (rooi);
  3. hand (hulle ervaar God deur aksie te neem, hulle toewyding en diens) (groen);
  4. en vlam (hulle ervaar God deur die mistieke, die natuur, stilte en ontsag) (geel).

Hoe maak ‘n mens ruimte in ‘n kleingroep of kategese groep vir al 4 tipes spiritualiteite?

 

 

 

 

(more…)

Wat is my spiritualiteit tipe?

Is jy blou, rooi, groen of geel? Watter van die volgende beskryf jou die beste?

Blou:
•Ek maak seker dat ek die Waarheid oor God weet.
•Ek hou daarvan om nog meer feite te ontdek van my geloof, wat my oortuigings onderstreep en duidelik maak.
•Ek doen moeite om die regte antwoord te kry op ander se vrae.
•Die Bybel is ‘n bron van kennis.

(more…)

Wat is die 4 spiritualiteit tipes?

Mense beleef God op verskillende maniere. Party mense beleef God deur iets nuut van God te verstaan of te lees. Ander beleef God deur musiek en emosies. Sommige verkies dit om iets prakties met hulle hande te doen en God só te beleef. Nog ander verkies om stil te word en God te aanbid.

(more…)

Wat is huisgeloof?

Die term “huisgeloof” word deesdae dikwels gebruik. Waarna verwys dit?

Gemeentes ontdek vandag opnuut dat geloofsvorming grootliks by die huis plaasvind. Jare lank het mense gedink ’n mens neem jou kinders kerk toe en daar leer hulle primêr van God. Vandag besef ons die huis en kerk vorm ’n span en albei hierdie ruimtes is belangrik vir geloofsvorming.

Huisgeloof verwys na gesinne (mense wat saam in ’n huishouding woon) wat saam hulle geloof uitleef en beoefen.

(more…)

Die binnewêreld van ‘n kind

Toegerus vir die Toekoms

Kinders as leë houers of klei?

Kinders is nie leë houers waarin ons soveel as moontlik moet gooi nie. Ons kan nie bloot kennis aflaai op kinders en hulle “vul” nie. Hulle is eerder klei wat oor tyd gevorm word. Ons moet eerder daarop fokus om tyd saam met hulle te spandeer en hulle te begelei deur hulle ervarings. Die belangrikste is dat ons verstaan dat hulle van die begin af volledig mens is met volle menswaardigheid. Hulle is nie met ‘n junior weergawe van die Heilige Gees gebore nie. Ons kan dus baie by hulle leer of saam met hulle leer, en nie net vir hulle leer nie.

(more…)

Huis geloof speletjies

Tydens die SAAM! gesprek oor intergenerasie bediening het ons ‘n speletjie gespeel wat ouers saam met kinders kan gebruik vir huisgeloof of wat jeugwerkers/predikante kan gebruik vir kategese.

Laai die bordspel, dobbelsteun en instruksies hier af:

Webwerf oor depressie

Webwerf oor depressie: depressie101

Hierdie is ‘n baie handige webwerf vir mense wat inligting benodig oor depressie, angs en selfmoord. Daar is ‘n afdeling met inligting sowel as ‘n afdeling wat raad gee oor hoe ‘n mens die siekte van depressie bestuur in jou lewe. Daar is ‘n maandelikse nuusbrief met nuttige inligting, sowel as kontakbesonderhede van instansies wat hulp kan verleen. Hierdie organisasie doen ook opvoedkundige toneelopvoerings by skole en kerke en lewer praatjies vir tieners of ouers.

http://depressie101.co.za/

Huisgeloof – ‘n gesprek oor die Heilige Gees

WIND

Staan in die wind of voor ‘n waaier. haal ook diep asem terwyl jou hand ‘n entjie voor jou (oop) mond hou. gesels oor hoe ‘n mens nie die Heilige Gees kan sien nie en nie altyd bewus is van die Gees nie. tog is Hy soos die wind of suurstof altyd om ons en in ons aan die werk. soms kan jy hom voel of sy werk sien.

STERRE

Staan buite in die nag en kyk na sterre. Gesels oor die sterre oor hoe wonderlik hulle is. Praat dan oor hoe helder elkeen brand en lig maak. gesels oor hoe die Heilige Gees ons help om lig te maak en te skyn deur hoe ons getuienis.

KERSE

Skakel al die ligte af en steek ‘n kers aan en kyk na hoe dit brand. gesels oor hoe die Heilige Gees ons troos en lei in moeilike (donker) tye.

SPIEEL

Staan voor ‘n spieel. hoe help die Heilige Gees ons om meer soos Jesus te lyk en op te tree? Hoe help hy ons om goeie besluite te neem.

KLEI

Speel met die klei. jul kan iets van jouself uitbeeld. gesels oor hoe die Heilige Gees ons vorm deur ons aan Jesus (en sy woorde) te herinner. Hoe verander / vorm die Gees ‘n mens?

TUIN

Plant saam saadjies of werk in die tuin / groentetuin. gesels oor hoe die Heilige Gees ons help om te groei. hoe is ons soos saad? Hoe gee Hy vir ons kos en water? Hoe snoei hy ons? Watter vrugte dra ons as die Gees deur ons werk?

ALARM

Stel almal ‘n wekker of horlosie of selfoon vir die tyd wanneer julle wil gesels. wanneer die alarms / wekkers afgaan gesels oor hoe die Heilige Gees ons herinner. Hy help ons onthou. Hy herinner ons aan Jesus se beloftes.

WATER

gaan stap langs water (‘n dam, swembad of waterpoel). gesels oor hoe belangrik water is vir die mens. wat beteken dit dat die Heilige Gees soos ‘n fontein in ons binneste is? wat beteken dit dat die Heilige Gees ons dors wil les en ons wil vul met lewende water?

Vir meer inligting, Bybelstudies of idees oor die Heilige Gees, besoek www.onsglo.co.za of laai die onsglo app af in die google playstore of in die appstore.

 

Huisgeloof doopviering

Huisgeloof – idees om die doop te vier in gesinne

  • Vind uit wanneer elkeen in die gesin se doopdatum is. Stoor dit op julle fone se kalenders en vier elke jaar op daardie dae ‘n “doop-verjaarsdag” saam met daardie gesinslid om hulle te herinner dat hulle God se kind is.
  • Vertel vir jou kinders van hul doopdag – kyk na fotos, vertel stories, lees weer saam die teksgedeelte. Vertel wat dit vir jou beteken het as ouer om jou kind te laat doop.
  • Vul ‘n bakkie met water en sit dit op julle etenstafel. Voor julle saam eet, gebruik ‘n oomblik om jul doop te vier. Julle kan byvoorbeeld elkeen ‘n vinger in die water doop en dan hardop bid: “Dankie Jesus dat ek gedoop is. Dankie dat U vir my lief is en altyd by my is.”

Vir ‘n Bybelstudie oor die tema “doop” besoek http://www.onsglo.co.za/2017/02/06/doop/

Die “onsglo” toep is ook gratis beskikbaar om af te laai vanaf die google playstore en die appstore.

Huisgeloof nagmaal gesprek

Idees om oor nagmaal saam te gesels in gesinne

  • Lees en bespreek die verhaal van die eerste nagmaal in Matteus 26: 26-30
  • Hoe sal jy die Nagmaal verduidelik aan iemand wat dit vir die eerste keer gaan gebruik?
  • Maak ‘n plakkaat met ten minste 5 verskillende woorde wat Nagmaal beskryf.
  • Vind uit wanneer julle volgende Nagmaal-Sondag by die gemeente is. Hoe kan jul as gesin daar dien? Bv. help met die brood sny, die tekens uitdeel, opwas na die tyd ens.
  • Bak brood saam as familie. Terwyl julle die brood bak gesels oor julle eerste Nagmaal ervaring of wat die Nagmaal beteken.

Om meer te lees oor nagmaal of ‘n Bybelstudie oor die tema saam te doen, besoek: http://www.onsglo.co.za/2017/02/06/nagmaal/

Die “onsglo” toep is ook gratis beskikbaar om af te laai vanaf die google playstore en die appstore.

Huisgeloof gesprek oor belydenis van geloof

Gesels as gesin oor Belydenis van Geloof

  • Teken ‘n tydlyn van die hoofstukke van jou lewe. Vul die hoogtepunte en laagtepunte in. Watter spesiale oomblikke wat jy wil onthou en vier? Hoekom was hierdie oomblikke spesiaal in jou lewe? Hoe was God teenwoordig in al die verskillende hoofstukke?
  • Maak ‘n lys van ‘n paar oomblikke in jul as gesin (of elkeen apart) se lewe waar jy ‘n spesiale ervaring van God gehad het.
  • Ouers kan deel wat dit vir hulle beteken dat hulle belydenis van geloof afgelê het. Watter betekenis hou dit vir hulle vandag in?
  • Vra iemand in jou familie of iemand wat jul ken wat reeds belydenis van geloof afgelê het, om te vertel van hul ervaring en wat dit vir hulle beteken het. 
  • Gesels oor hoe Belydenisaflegging ‘n “antwoord op jou doop” is.

 

Vir ‘n Bybelstudie oor die tema “belydenis van geloof” besoek www.onsglo.co.za/2017/02/06/belydenis-van-geloof/

Die “onsglo” toep is ook gratis beskikbaar om af te laai vanaf die google playstore en die appstore.

 

Doopgesprek

Wil jy met ouers gesels oor die doop? Of met ‘n Belydenisklas? Wil jy dalk ‘n doopherinnering doen?

Ds Tinus van Zyl verduidelik die 5 basiese betekenisse van die doop in die volgende artikel:  http://www.onsglo.co.za/2017/02/06/doop/

Indien jy ‘n preek wil doen hieroor, of ‘n gesprek wil fasiliteer, volg ook dieselfde skakel vir ‘n teks, gespreksvrae, praktiese aktiwiteit en ‘n gebedswenk.