refleksies

Tendense by jong volwassenes en geloof

Wil jy jong volwassenes graag beter verstaan? Wat is die eienskappe van jong volwassenes tussen die ouderdomme van 18-35 jaar? Die nuutste navorsing van die Barna Group saam met die organisasie World Vision wys die volgende wêreldwye tendense uit onder hierdie generasie:

  1. Verbind aan ander, maar eensaam – ten spyte daarvan dat hierdie generasie uiters verbind is aan mekaar en die wêreld, voel hulle eensaam.
  2. Geestelike openheid – daar is in die algemeen ’n openheid van hierdie generasie teenoor spiritualiteit, godsdiens en selfs die kerk. Maar minder onder diegene wat hulle geloof verlaat het.
  3. Era van angs – bekommernisse en onsekerheid, dikwels oor dinge soos beroep en finansies, is ‘n prominente eienskap van hierdie generasie wat grootgeword het in ‘n chaotiese en komplekse tyd.
  4. Op soek na antwoorde – menslike lyding en wêreldwye konflik is van die belangrikste dinge wat geestelike twyfel veroorsaak vir jong volwassenes.
  5. Veerkragtige dissipelskap – dit is die eienskap wat Christene die meeste vorm in hierdie ouderdomsgroep, ongeag die godsdienstige klimaat of konteks.
  6. Behoefte om ‘n verskil te maak – wanneer jong volwassenes betrokke raak by ’n geloofsgemeenskap is hulle op soek na konkrete lering, geleenthede om te veg teen ongeregtigheid en vriende om by hulle aan te sluit.

Daarom stel die Jong Volwasse Leer Gemeenskap (JVLG) voor dat gemeentes kreatief moet dink oor die volgende vrae:

  • Hoe help ons hierdie generasie om tuis te kom sodat verhoudings verdiep en diversiteit gevier word?
  • Hoe skep ons kreatiewe geleenthede vir jong volwassenes met ‘n verskeidenheid van spiritualiteit tipes om God te ontmoet en te aanbid?
  • Hoe spreek ons die generasie se angs en onsekerheid aan deur self broosheid te omarm?
  • Hoe raak ons ‘n veilige ruimte vir egtheid om moeilike kwessies te bespreek terwyl ons ook ruimte laat vir twyfel en teenstrydighede?
  • Hoe kan ons ervarings tussen generasies deel en saam antwoorde soek op reis na wysheid?
  • Hoe help ons mense begelei om hul roeping uit te leef? Hoe bevorder ons leierskap en hou ons mekaar en sisteme verantwoordbaar?

Lees meer oor die Barna en World Vision navorsing by www.theconnectedgeneration.com. Lees meer oor die Jong Volwasse Leer Gemeenskap se navorsing by http://dinkjeug.ngkerk.net/category/jong-volwassenes/

 

Geskryf deur ds Anriëtte de Ridder (Predikant in Sinodale Diens vir Jeug- en Familiebediening van die Wes-Kaapland Sinode).

Hoe “groen” is jou God?

Ekologie begin by teologie

Ekologie, aardverwarming, herwinning… Die meeste van ons dink hierdie saak is belangrik, maar in die praktyk is dit ‘n ander storie. Hoe “groen” is jou en jou gesin se lewe? Dit hang natuurlik baie af van hoe “groen” jy dink jou God is!

Kom ek begin by die begin. Die mens is geskep as God se verteenwoordiger, Sy beeld, met die opdrag om die aarde te bewoon en te bewerk. Toe loop dinge skeef. Jesus kom om die mens te red, maar… o aarde! Wat van die aarde? Hoe verstaan ons vandag die mens se identiteit, opdrag en verantwoordelikheid?

Hoe “groen” jy dink, word dus bepaal deur jou teologie. As jy glo dat Jesus net gekom het om ons van ons sondes te verlos, gaan jy nie werklik die oortuiging hê om te herwin nie. As jy glo dat Jesus ons net roep om dissipels te maak, gaan daar nie veel tyd oor wees vir blikkies optel nie. As jy van oortuiging is dat die kerk se belangrikste taak is om sonde uit te wys, gaan ‘n wurmplaas laaste op die lys wees. En as jy dink die hemel is iewers anders as op aarde, gaan bome plant ’n mors van tyd wees. Om “groen” te dink, daag dus ook jou teologie uit!

‘n Gemeentelid noem aan my dat hy glad nie ‘n “groen mens” is nie, tog noem hy homself ‘n rentmeester?! ‘n Lidmaat vra my hoekom ons gemeente betrokke is by herwinning, dit het dan niks met die kerk te doen nie?! In kontras daarmee lees ek in ‘n boekwinkel agter op ‘n Bybel met die naam “The Green Bible – Harpers” die volgende woorde: “Jesus is coming… quick, plant a tree!”

Vir my is “groen” ‘n omvattende manier van dink oor God se Koninkryk. God het die mens EN die hele aarde lief. Sy redding en genesing is nie net vir siele nie, maar vir sy HELE Skepping. Sy Koninkryk is nie net die kerk nie, maar ELKE sfeer van die lewe. Om “groen” te wees beïnvloed elke aspek van my lewe, insluitend die manier waarop ek begeer, koop, eet, gebruik, besit, bewaar en weggooi. Dit gaan oor watter legacy my lewe agterlaat.

Wat kan jy en jou gesin prakties begin doen (of ophou doen) om “groener” te leef? Kom as familie bymekaar en besluit watter “groen” keuse julle saam kan neem.

Laat U Koninkryk kom; laat u wil ook op die aarde geskied… Matt 6:10

 

Geskryf deur ds Anriëtte de Ridder (Predikant in Sinodale diens vir Jeug en Familiebediening van die Wes-Kaapland Sinode)

 

Die lang pad is die beter pad

Ons weet wat ons wil hê, maar is nie altyd bereid om te doen wat nodig is om dit te bereik nie. Dan kies ons soms kortpaaie, wat natuurlik nie altyd die beste paaie is nie. C.J. Langenhoven het gesê: “As die kortpad die beste was sou die hoofpad daar geloop het.”

Hierdie beginsel geld ook vir sukses, fiksheid, skoonheid, eksamens, geldmaak, vriendskap, ons huwelik, troeteldiere… ja, amper enige iets. Ook beslis vir die jeugbediening.

Ons wil graag gelowige volwasse jongmense hê wat oral en altyd ………………  (vul self die gaping in: byvoorbeeld stil sit/stilbly in die kerk, luister as ons praat, vriendelik is, dankbaarheid toon, weekliks opdaag, aktief deelneem aan gesprekke, sinvolle vrae vra, goeie besluite neem, opbouende verhoudings hê, die nagmaal /belydenisaflegging respekteer, uitreike en kampe bywoon, hul geloof uitleef, ens.)

Maar wat is die koste vir ons (goeie) wense? En is ons bereid om die lang pad met die jongmense te loop om daar uit te kom?

Kortpaaie ken ons almal – gee ‘n prekie om ‘n kind/tiener te laat skuldig voel, raas/baklei/pleit vir goeie gedrag, skinder oor ‘n kind/tiener se foute/wangedrag, blameer ouers, vind fout in die kategesesisteem, of die ergste: gee op.

Die lang pad van dissipelskap en verhoudingsbou se koste is hoog – dit vra tyd, en wysheid, en gebed, en toewyding, en vergifnis en weer probeer, en ‘n voorbeeld wees, en omgee, en opbou, en onvoorwaardelik liefhê en geduld, geduld en nogmaals geduld. Die dissipels het drie jaar saam met Jesus geleef en steeds eer gesoek, aan die slaap geraak, geweld gebruik, misverstaan, verraai, verloën en getwyfel. Jesus het egter die lang pad van die liefde gekies.

  • Hoe kan jy hierdie week die lang pad van die liefde kies?

 

Die liefde is geduldig. Die liefde is vriendelik. Dit bedek alles, glo alles, hoop alles, verdra alles.

1 Kor 13: 4a en 7

Anriëtte de Ridder (Predikant in Sinodale diens vir Jeug en Familiebediening van die Wes-Kaapland Sinode).

 

 

Kerk + huis deur Mark Holmen

Mark Holmen se boek “Kerk+ Huis. Die Beproefde formule om lewenslange geloof te bou” bied ‘n eenvoudige huisgeloof strategie vir gemeentes.

Blywende, lewenslange geloof word selde deur kerkprogramme aangeleer, maar eerder “aangesteek” deur ’n leefstyl van geloof wat by die huis uitgeleef word. Maar hoe kan jou gemeente huise toerus om (weer) die belangrikste plek te word waar geloof gevoed word? Deur ’n HuisGeloof-gemeente te word. Mark Holmen se boek Kerk + Huis bevat alles wat jy nodig het om ’n HuisGeloof-fokus in die DNS van jou geloofsgemeenskap in te weef.

Kerk + Huis bou voort op die bedieningskonsepte wat Holmen deur die vinnig groeiende, internasionale HuisGeloof-beweging verfyn het. Jy sal ontdek hoe om jou gemeentelede se huise as die belangrikste geboorteplek van geloof te hervestig deur ’n lewenskragtige, doeltreffende HuisGeloof-bediening in jou gemeente te vestig, ongeag hoe groot of klein dit is.

Jy kan die boek, in afrikaans vertaal, bestel by Bybelmedia: http://eshop.bybelmedia.org.za/product/kerkhuis/

By hierdie skakel is daar ook ‘n nuttige boekresensie deur Dr Wouter van Wyk gratis aflaaibaar.

The Millennial Narrative – Jaco Hamman

Hoe moet ons oor Millenials, geloof en die toekoms dink?

Jaco Hamman het tydens ‘n aanbieding in Stellenbosch in Augustus 2018 oor sy boek “The Millennial Narrative” wat eerdaags verskyn, die volgende genoem:

  • As ons nie die Millennial generasie bereik nie, sal Christenskap as geloof  in gedrang kom.
  • Millennials verlang na die “goeie lewe” en stel nie belang in die “goeie nuus” soos ons dit tradisioneel aanbied nie.
  • Bediening aan, deur en saam met Millennials vra dat ons vars dink – buite die konvensies van tradisionele denke.
  • Die boek Joël in die Ou Testament kan ons help met die teologiese vertrekpunt wat ons hiervoor benodig.
  • Millennials kan ons help herdefinieer wat dit beteken om Christen te wees – hulle sal nooit glo en doen soos ons nie.

Jaco Hamman se boek “The Millennial Narrative” verskyn in Oktober 2018.

 – opgesom deur Anriëtte de Ridder

Hoe vorder die gesprek oor Jong Volwassenes in jou gemeente?

Gebruik hierdie vrae in die ring of kerkraad om te luister en te evalueer hoe die gesprek oor Jong Volwassenes (s.g. millennials) vorder….

  • Vertel wat jy/julle gedoen het om te ontdek wat jongmense nodig het?
  • Of vertel van ‘n keer toe jy/julle jongmense betrek het?

Dalk het jy:

  • Doelbewus met ‘n millennial gesels?
  • Die plakker uitdaging gedoen? (deel ‘n wacky Wednesday burger special, koop data, speel ‘n bordspeletjie, stap in die natuur, maak saam kos)*
  • Die poskaarte gebruik met die verhale van millennials agterop?*
  • ‘n gesprek gereël in jou ring of dorp oor of met jong volwassenes
  • ‘n Vergadering beplan met millennials op die agenda
  • ‘n Jong predikant, Jeugwerker of theologies student genooi of leer ken
  • ‘n Kursus bygewoon, ‘n artikel of boek gelees of ‘n youtube video gekyk oor die millennial generasie of die toekoms van die kerk
  • ‘n Jonger persoon betrek by ‘n diensgroep, kommissie, bediening of projek
  • ‘n Jong volwassenes betrek by die kerkraad of ander leiersgroep

Vrae en voorbeelde stamgestel deur die Jong Volwasse Leer Gemeenskap 2018.

*Die “Gotta Love Millennials” plakker uitdaging en die poskaarte kan in elektronies formaat gratis aangevra word by jeug@sun.ac.za.

Die Jong Volwasse Leer Gemeenskap se vraag

Die Jong Volwasse Leer Gemeenskap (JVLG) het ‘n vraag formuleer om…

  • eerstens hul navorsing op te som tot dusver;
  • tweedens om die crux van die uitdaging te formuleer;
  • en derdens ‘n vraag te vind wat almal op alle vlakke van kerkwees kan help om na te dink oor jong volwassenes, die kerk en die toekoms

Die vraag is…

Wat kan ons volhoubaar anders doen sodat jong volwassenes vanuit egte gemeenskap ten volle (“fully alive”) kan leef met geloof, wysheid en roepingsbewustheid?

Hoekom dié vraag?

(more…)

12 Wenke om oud en jonk aan mekaar te verbind in jou gemeente

Hoe kan huidige ruimtes of geleenthede anders ingerig word om verskillende mense en generasies aan mekaar te verbind?  

Hier is 12 wenke:

  1. Kampe is ‘n wonderlike geleentheid om inter-ouderdom spasies te skep waar verskillende generasies kan “connect” aan mekaar, maar dan moet almal deelneem (daar moenie deelnemers en toeskouers wees nie). Skep rolle vir allerlei mense (nie net kategete nie, maar ook studente, middeljariges en ouer mense) en gee vir almal verantwoordelikhede, sodat almal met ‘n doel gaan.
  2. Kinder vakansie programme kan ook só aangebied word sodat kinders, tieners en volwassenes betrek word en beide tieners én volwassenes die kinders dien. Om saam te werk na ‘n gemeenskaplike doel bind mense saam.
  3. #imagine is ‘n ideale geleentheid om ‘n hele gemeente te betrek om saam te gaan kamp en verhoudings te bou. Skep ‘n gesamentlike doel soos om te help by die gebedstasies (#imagine se “encounter stations”).
  4. Betrek gesinne / huishoudings by huidige diensprojekte of uitreike sodat hulle leer om ook saam ‘n verskil te maak bv. om families te nooi om saam broodjies te kom smeer vir ‘n plaaslike sopkombuis of ouers saam te nooi op ‘n jeug uitreik.
  5. Betrek die hele familie as eredienswerkers of om mense by die deure te verwelkom. Gee vir hulle toerusting sodat hulle byvoorbeeld ook leer om kinders te groet (byvoorbeeld met ‘n “high five” of “fist pump”).
  6. Laat kinders saam met ouers die nagmaaltekens uitdeel.
  7. Benader tradisionele gemeente sang op ‘n heel ander manier. “Blended worship” is ‘n uitdaging, maar tog kan ‘n mens nie net die erediens laat besit deur sekere ouderdom mense nie. Een styl kan nie oorheers nie. As dit ons kerk begrip is dat ons álmal wil verwelkom en tuiskom in die erediens, moet ons ook bereid wees om nuut te dink oor die keuse, styl en samestelling van die liedere.
  8. Betrek kinders en tieners by die begeleidingsgroep.
  9. Reël ‘n  inter-ouderdom staptoer of uitstappie waar volwassenes jongmense op ‘n ander manier kon leer ken en wedersydse verhoudings gebou kon word.
  10. Gebruik en bevestig tieners as leiers in die gemeente bv. as kerkraasdslede of op kommissies of as jeug leierspan. Dit gee vir hulle ook ‘n stem en deurdat hulle diensbaar is en verantwoordelikheid neem, groei hulle ook. Dit is egter belangrik om met dié tiener leiers tyd te spandeer en verhoudings te bou en hulle nie net alleen te laat nie.
  11. Nooi volwassenes wat nie by die kategese betrokke is nie, om die kategese groep te kom besoek. Hulle kan byvoorbeeld hulle ervaring of stories (ook stories van gebrokenheid of foute) te deel met die tieners. Op só manier kan tieners ook verhoudings met ander volwassenes bou.
  12. Gebruik tieners as leiers (of hulpleiers) by die kategese en by kampe. so kan hulle reeds vroeg leer dien en lei.

Saamgestel deur die Familie Netwerk, ‘n inisiatief van die Taakspan Jeug en Familie van die Sinode van Wes-Kaapland.

12 Wenke om families te laat tuiskom in jou gemeente

Die lede van die  Familie Netwerk het aan 12 wenke gedink om gemeentes meer familie vriendelik in te rig (overal vir nuwe persone en besoekers):

  1. Gebruik foto’s van verskillende rasse en tipe families in PowerPoint
  2. Let op taal – verwelkom byvoorbeeld alle ouderdomme persone, noem altyd waar die kleedkamers en ruimtes vir klein kinders is, sodat besoekers maklik tuis kan kom
  3. Let op hoe die voorportaal lyk– is daar byvoorbeeld foto’s van kinders op die mure, is dit rolstoel vriendelik?
  4. Betrek bejaardes by die jeug- of kinderbediening deur geleenthede te skep vir stories vertel. Spesifieke geleenthede kan hiervoor gereël word of huidige geleenthede kan hiervoor ingespan word.
  5. Hang foto’s van die kategese groepe in die voorportaal – dit gee vir kinders / jongmense die boodskap gee dat hulle belangrik is en welkom is.
  6. Pak klein tafeltjies, stoeltjies, Kinderbybels en inkleur goed in die erediens ruimte uit – dit laat voorskoolse kinders welkom voel en bevorder hulle deelname.
  7. ‘n Klimraam of bordkryt buite en ‘n tafel met koeldrank kan kleiner kinders laat tuiskom terwyl ouers saamkuier na ‘n erediens.
  8. Benoem ‘n moederskamer eerder “ruimte vir ouers met babas” en kyk of die ruimtes voldoende is en vriendelik is
  9. Is daar genoeg aanwysings sodat besoekers weet waar alles is? Is dit in verstaanbare terme?
  10. Doen weeklikse verjaarsdae vieringe met sjokolade of ‘n kaartjie – kry tieners om te help om dit uit te deel.
  11. Gebruik die kinderoomblik of familietyd in die erediens om huisgeloof aktiwiteite in te oefen – so word huisgesinne / -houdings versterk.
  12. Gebruik verskillende ouderdom, geslag en tipe personen om getuienisse te gee of ‘n gebed te doen / voor te lees in die erediens.

Die Familie Netwerk is ‘n inisiatief van die Jeug en Familie Taakspan van die Sinode van Wes Kaapland.

Hoe kan ‘n gemeente ‘n familie raak? (deel 2)

Nog gespreksnotas van die Familie Netwerk byeenkoms gehou op 19 Julie 2018 aan die hand van ‘n hoofstuk “Congregations as Family” in die boek “Passing on the Faith. A Radical New Model For Youth and Family Ministry” deur Merton P. Strommen en Richard A. Hardel. 

“Gemeentes het nie bloot ‘n “familiebediening” nie, maar ís ook in geheel ‘n familiebediening”.

Hierdie was die onderwerp van die onlangse Familie Netwerk gesprek. Dié gesprek het daartoe gelei dat ons besef het dat gemeentes nuut moet dink oor hoe hulle ruimtes, atmosfeer en geleenthede ingerig word sodat almal deel kan voel van die gemeente as groter familie.  Dikwels word kinders slegs verdra in die erediens, eerder as wat die erediens ook aan hulle behoort. Maar waar begin ‘n mens die kultuur in ‘n gemeente skuif?

Ons voorstel is dat jy ‘n gespreksgeleentheid met die Kerkraad of met leiers van die gemeente reël en die volgende vrae vra:

(more…)